Ақылы еңбекке жарамсыздық парағын енгізу туралы ақпарат шындыққа жанаспайды

Еңбек және халықты әлеуметтік қорғау министрлігі 2026 жылдан бастап өзін-өзі жұмыспен қамтыған азаматтарға Мемлекеттік әлеуметтік сақтандыру қоры (бұдан әрі – МӘСҚ) қаражаты есебінен ақылы еңбекке жарамсыздық парағын енгізу туралы бірқатар бұқаралық ақпарат құралдары мен әлеуметтік желілерде тараған ақпарат шындыққа сәйкес келмейтінін мәлімдеді, – деп хабарлайды  Aikyn.kz.

Қолданыстағы заңнамаға сәйкес, МӘСҚ қаражаты есебінен әлеуметтік төлемдер міндетті әлеуметтік сақтандыру жүйесінің қатысушыларына тек мынадай әлеуметтік тәуекелдер туындаған жағдайда ғана жүзеге асырылады:

- еңбек қабілетінен айырылу;

- асыраушысынан айырылу;

- жұмысынан айырылу;

- жүктілікке және босануға, жаңа туған баланы (балаларды) асырап алуға байланысты табысынан айырылу;

- баласы бір жарым жасқа толғанға дейін оның күтіміне байланысты табысынан айырылу.

Осыған байланысты МӘСҚ қаражаты есебінен уақытша еңбекке жарамсыздық (ауру парағы негізінде) бойынша төлемдер жалдамалы қызметкерлерге де, өзін-өзі жұмыспен қамтыған азаматтарға да көзделмеген.

Сонымен қатар  2026 жылдың 1 қаңтарынан бастап өзін-өзі жұмыспен қамтыған азаматтар үшін әлеуметтік төлемдерді төлеуді көздейтін жаңа салық режимі енгізілетінін хабарлаймыз. Міндетті әлеуметтік сақтандыру жүйесіне қатысу жоғарыда аталған әлеуметтік тәуекелдер туындаған жағдайда МӘСҚ есебінен әлеуметтік төлемдер алуға құқық береді.

Еңбек және халықты әлеуметтік қорғау министрлігі азаматтарды және бұқаралық ақпарат құралдарының өкілдерін тек ресми дереккөздерге сенуге шақырады, – делінген арнайы хабарламада.

Сараптама, зерттеу мақала, күнделікті өзекті ақпаратты «Айқынның»  TELEGRAM  арнасынан табасыз.