Аралдан Астанаға дейін: Байтақ партиясы экологиялық керуенге шықты

Қазақстанның бірнеше өңірін қамтыған «Байтақ» жасылдар партиясының эко-керуені жолға шықты. Шара 3 шілде күні Арал қаласынан басталып, 12 тамызға дейін жалғасады. Мәре Астанада өтеді.

ОСК «Байтақ» жасылдар партиясының партиялық тізімін тіркеді

Бүгін аралдағы Балықшылар аллеясында эко-керуеннің ресми ашылуы болды. Жолға шықпас бұрын партия төрағасы Азаматхан Әміртаев Астанадан арнайы жеткен партия туын Арал өкіліне табыстады. Бұдан соң акцияға қатысушылар жалауға жеке-жеке қолтаңбасын қойып, бұл сәтті ерекше атап өтті. 

«Алғашқылардың бірі болып жалауға қол қоюға рұқсат етіңіздер. Бәріміздің арманымыз бір – ол Аралдың қалпына келуі. Сол арманымыз іске ассын деп тілейік», деді Азаматхан Әміртаев.

Партия төрағасы эко-керуеннің дәл осы өңірден бастау алғанының өзіндік мәні барын айтты.

«Арал – табиғатқа жауапсыз қараудың салдары қандай ауыр екенін бүкіл әлемге көрсеткен ең ірі экологиялық апат. Сондықтан бұл – экология мәселесіне бейжай қарауға болмайтынын айқын еске салатын маңызды аймақ», деді партия төрағасы.

Шараның басты мақсаты – қоршаған ортаны қорғау мәселесі қоғамның да, мемлекеттің де күн тәртібіндегі басым бағыттардың бірі болуға тиіс екенін көрсету. Табиғатқа немқұрай қарау қоршаған ортаға ғана емес, елдің экономикалық дамуына, халықтың әл-ауқаты мен денсаулығына да кері әсер етеді.

«Байтақ» жасылдар партиясы сайлауға 51 кандидат ұсынды

Экологиялық керуен 10 күнге жалғасады. Сол аралықта жасылдар еліміздің алты өңірі мен республикалық маңызы бар екі қалаға баруды жоспарлаған. Сапар барысында партия өкілдері тұрғындармен кездесіп, сайлауалды бағдарламаны таныстырады, сондай-ақ өңірлердегі өзекті экологиялық және әлеуметтік мәселелерді талқылайды.