Асхат Аймағамбетов ювеналды инспекторларды мектепке тұрақты негізде қайта енгізуіміз керегін айтты

Мәжіліс депутаты Асхат Аймағамбетов жасөспірімдер арасындағы буллинг, күш көрсету, бейәдеп мінез-құлықтың таралуы қауіпке айналғанын айтты, - деп хабарлайды Аikyn.kz сайты.

Оның айтуынша, бұрын көп жылдар бойы мектептерде ювеналды полиция инспекторлары жұмыс істейтін. Олар балалармен, ата-аналармен, тәуекел тобындағы жасөспірімдермен жеке жұмыс істеп, құқықбұзушылықтың алдын алатын.

– Алайда соңғы жылдары бұл мамандар мектептен алынып тасталды. Салдарынан барлық жүктеме мұғалімге түсіп отыр. Бірақ мектеп – полиция емес, ал мұғалім құқық қорғау қызметкері емес екенін барлығымыз білеміз. Бүгінгі ахуал не көрсетіп отыр? Жасөспірімдер арасындағы буллинг, күш көрсету, бейәдеп мінез-құлық, тіпті ұрлық сияқты ұғымдардың таралуы шынайы қауіпке айналып отыр", – деді Асхат Аймағамбетов.

Мәжіліс депутаты мәселенің артында әлеуметтік желілердің ғана емес, ювеналды полиция жүйесінің әлсіреуі тұрғанын қозғады.

Айтуынша, ювеналды инспекторлар мектепке қайтып оралуы қажет.

– Тағы бір мәселе – мектеп психологтарының жетіспеушілігі. Бүгінде бір психологқа 800-1000 оқушыға дейін келеді. Халықаралық норма бойынша ең көбі 300 оқушы. Осы мәселені шешпейінше, алдын алу жұмысын тиімді деп айту әрине қиын. Біріншіден, бізге ювеналды инспекторларды мектепке тұрақты негізде қайта енгізуіміз керек. Екіншіден, "мектеп – полиция – білім бөлімдері" арасында нақты бірлескен регламент пен жауапкершілік жүйесін бекітуіміз керек. Үшіншіден, әлеуметтік педагог пен психолог проблемасын шешу керек", – деді ол.