Ашықбаев: Қауіпсіздіктің жаңа архитектурасы тек қана институцоналды реформалармен құрылуы мүмкін емес

- Астана ортақ әрі бөлінбейтін Еуроатлантикалық, Еуразиялық қауіпсіздік қауымдастығын қалыптастару жөніндегі көпжақты күш-жігерді қолдайды. Біздің пайымызша, қауіпсіздіктің жаңа архитектурасы тек қана институцоналды реформалармен құрылуы мүмкін емес. Ол мызғымастық, көпжақтылық қағидаттарын растауды және барлық мүше мемлекет құқығының үстемдігін талап етеді. Біз жаһандық басқару жүйесінде қауіпсіздіктің өңірлік аспектісіне барынша маңызды мәртебе беруді жақтаймыз. Қауіпсіздіктің жаңа архитектурасы «төменнен жоғары», «өңірлік тұрақтылықтан жаһандық бейбітшілікке қағидаты» негізінде құрылуы тиіс, - деді Ержан Ашықбаев.

Оның айтуынша, жылдам технологиялық прогресс жағдайында қауіпсіздік саласындағы сын-қатерлер жаңа әрі күрделі өзгерістерге ие болып отыр. Мұндай қатерлердің бірі жасанды интеллектіні реттеудің ортақ халықаралық аясын әзірлеу болып тұр.

- Қазақстан жасанды интеллект бойынша әлемдік тәсілдер мен нормативтік стандарттарды үйлестіруге бағытталған осы саладағы жаһандық диалогқа белсенді қатысатынын растайды. Жасанды интеллектіге қол жеткізу әділ, ашық болуы тиіс екеніне сенеміз. Бұл жай ғана технологиялық мүмкіндіктер мәселесі емес. Сөз теңдей мүмкіндіктер, мемлекеттердің цифрлық егемендігі және барлық елдің болашақ жаһандық дамуды қалыптастыруға әділ қатысуы жайында болып отыр, - деді СІМ бірінші орынбасары.

Айта кетейік, форум барысында Орталық Азия сараптамаларын әлемдік зерттеу қауымдастықтармен біріктіретін платформа іске қосылды.

ҚР Президенті жанындағы Қазақстанның стратегиялық зерттеулер институты ұйымдастырған іс-шараға әлемнің 20 елінен 40-қа жуық шетелдік сарапшы, жетекші «ақыл-ой орталықтарының» басшылары мен зерттеушілері қатысып жатыр. Форум аясында өтетін 9 тақырыптық сессияда әлемдік саясат пен халықаралық қатынастардың негізгі бағыттары талқыланбақ.