Astana Мotors өндіріс көлемін арттырмақ

Astana Motors алдағы бес жылда елдегі автокөлік өндірісін 51%-ке жеткізуді жоспарлап отыр.

Бұл туралы компанияның Алматыда өткізген баспасөз туры кезінде белгілі болды. Журналистер Astana Motors Manufacturing Kazakhstan және Hyundai Trans Kazakhstan зауыттарын өз көзімен көріп қайтты. 

Алматыдағы автокөлік шығаратын мульти брендті зауыт – Astana Motors Manufacturing Kazakhstan. Бұл әлемдегі үш бірдей көлікті бір орында өндіретін алғашқы кәсіпорын. Атап айтқанда, қытайлық Chery, Great Wall Motor және Changan темір тұлпарлары ұсақ түйінді әдіспен құрастырылады. Зауыттың жылдық қуаттылығы 120 мың темір тұлпарға жеткен. Кәсіпорын толықтай іске қосылған соң, машиналардың 40%-і Қазақстанда, 60%-ы шетелге экспортталмақ.

Бекнұр Несіпбаев, Astana Motors компаниясының бас атқарушы директоры:

- Осы дәнекерлеу және бояу әдісімен шығарылатын автокөліктердің саны ұлғайса, ол Қазақстанның локолизациясын көбейтуге үлкен себепкер болады. Өйткені  автокөлік 2 мыңнан астам қосалқы бөлшектен тұрады. Сол бөлшекті осы Қазақстанда шығаруға мүмкіндік туындап отыр.

Astana Motors технопаркінде жасалатын мультимедиалық жүйелер мен автокөлік орындықтары қазір Hyundai Trans Kazakhstan зауытына жеткізілуде. Ал келер жылдан бастап бұл өнімдер жаңа мультибрендтік зауытқа да жөнелтілетін болады. Компания өз жұмысшылары үшін де жайлы жағдайдың бәрін жасаған .Түрлі демалыс орындары, кинотеатр мен кітапхана және спорт залдары қарастырылған.

Азамат Жанұзақов, AMMKZ дәнекерлеу цехының учаске басшысы:

- Киімнен бастап айтатын болсақ, барлығымен қамтамасыз етеді. Аяқ киімнен бастап, бас киімге дейін қамтылады. Түскі ас беріледі. Тіпті жеткізіп салу бар дейді. Яғни адамдарды жеткізу. Бәрі бар.

Astana Motors өндіріс желілерін жаңарту, жергілікті үлесті арттыру және өз жұмысшыларының шеберлігін шыңдау ісіне келгенде аянып жатқан жоқ. Компания басшлығының айтуынша, осы тоқтаусыз еңбектің нәтижесінде Қазақстанның Орталық Азияда автокөлік өндіру саласындағы рөлі күшейіп келеді.