Астанада автобус аялдамасын бүлдірген азамат ұсталды

Елордада полиция қызметкерлері Кенесары көшесінде орналасқан автобус аялдамасының павильонына зиян келтірген ер адамды жедел анықтап, ұстады, – деп хабарлайды Aikyn.kz сайты.

Оқиға кешкі уақытта болған. Белгісіз азамат аялдаманың шыны құрылымын сындырып, оқиға орнынан қашып кеткен.

Бірақ ол алысқа ұзай алмады. Тәртіп сақшылары құқық бұзушыны тез арада тауып, қолға түсірді. Белгілі болғандай, 33 жастағы қала тұрғыны алкогольдік мас күйінде аялдаманың беріктігін «сынап көруді» жөн көрген. Бұл әрекеті үшін ол әкімшілік жауапкершілікке тартылды. Бөгде мүлікті қасақана бүлдіру дерегі бойынша әкімшілік іс қозғалды.

Полиция қала мүлкіне ұқыппен қарауға шақырады. Мұндай әрекеттер тек материалдық шығын келтіріп қоймай, қаланың көркіне де нұқсан келтіреді. Кез келген құқықбұзушылық заң шеңберінде жауапкершілікке әкеп соғады.