Астанада жаңа форматтағы студенттік жатақхана ашылды

Астанада 938 орынға арналған акселерация орталығы бар жаңа студенттік жатақхана іске қосылды. Жоба ғимараты Сарыарқа ауданы, Бейбітшілік көшесінде орналасқан, оны BI Engineering & Construction компаниясы тұрғызды. Нысанды пайдалануға беріп, толыққанды жұмысын бастауға дайындап жатыр, – деп хабарлайды Aikyn.kz.

Жалпы ауданы 14,4 мың шаршы метрден асатын кешен жертөле қабаты бар тоғыз қабатты ғимараттан тұрады. Сегіз қабаты колледж студенттеріне арналған тұрғын аймақ болса, бірінші қабат толықтай қоғамдық кеңістікке арналған. Коуоркинг пен кітапхана, акт залы мен кино залы, жаттығу залы, асхана, медициналық пункт және қонақтарға арналған орын бар.

Тұрғын қабаттардағы бөлмелер толық жабдықталған. Әр қабатта асүй мен тамақтануға арналған аймақ бар. Қауіпсіздікке басты назар аударылған. Ғимаратқа Face ID арқылы кіруге болады, ортақ аймақтарда тәулік бойы бейнебақылау жүргізіледі.

Жоба мемлекеттік-жекеменшік әріптестік (МЖӘ) арқылы BOOT (build, own, operate, transfer) моделі аясында жүзеге асырылды. Жатақхананы басқаруға орташа жалақысы шамамен 300 мың теңге болатын 40-қа жуық жұмыс орны ашылады.

Жоба жетекшісі Дархан Тоғаевтың айтуынша, басты мақсат – студенттердің жатақханада тұру моделін қайта қарастыру.

«Біз жатақхананы бастапқыда тек өмір сүретін орын ретінде емес, студенттердің дамуына арналған толыққанды орталық деп қарастырдық. Сондықтан архитектуралық концепцияда қоғамдық кеңістіктердің рөлі тең. Мұнда білім алу, командалық жұмыс, іс-шаралар өткізу және жобаларды іске қосуға арналған алаңдар бар. Негізінде, бұл студенттерге оқу орындарының жанында тұрып қана қоймай, өз бастамаларын дамытуға мүмкіндік беретін инфрақұрылым», – деді ол.

Нысанның концепциясы үйреншікті жатақханалардан ерекше. Жобада қоғамдық кеңістіктер тұрғын қабаттардың жайлылығын бұзбайды, студенттік өмірді белсенді өткізуге жағдай жасалған. 

BI Engineering & Construction компаниясының мемлекеттік-жекеменшік әріптестік жөніндегі директоры Олег Тен мұндай жобалардың қалалық инфрақұрылымды дамытудағы маңызын атап өтті.

«МЖӘ мемлекет пен бизнестің ресурстарын біріктіре отырып, маңызды әлеуметтік нысандарды жылдамырақ әрі тиімді жүзеге асыруға мүмкіндік береді. Студенттерге арналған мыңға жуық жаңа орын мен заманауи білім беру инфрақұрылымы пайда болды, бизнестің ұзақмерзімді әлеуметтік жобаларға инвестиция салу мүмкіндігі бар. Мұндай әріптестік қалалық ортаның тұрақты дамуына жол ашады», – деді ол.

Жобаның ауқымын әлі де кеңейтуге болады. Тұрғын қабаттар, стандартталған инженерлік шешімдер және функционалдық аймақтарға бөлу сияқты ерекшеліктер концепцияны әртүрлі етіп бейімдеуге және елдің басқа қалаларында ұқсас жатақханаларды жүзеге асыруға мүмкіндік береді.

Салтанатты ашылу салтанатынан кейін студенттер жатақханаға орналастырылды.