Астанадағы LRT нің баспана нарығына әсері: желі бойындағы пәтер бағасы өзгере ме

LRT желісі жақын айларда пайдалануға беріледі деп күтіліп отыр.

Сарапшының айтуынша, бағыт бойындағы және бекеттерге жақын орналасқан пәтерлерге сұраныс қазірдің өзінде айтарлықтай артқан.

— Сатып алушылар да, жалға алушылар да LRT желісінің маңындағы аудандарды алдын ала қарастырып жатыр. Олар көлік қолжетімділігі жақсарып, іске қосылғаннан кейін жылжымайтын мүлік құны өседі деп үміттенеді. Әсіресе болашақ бекеттердің маңында сұраныс соңғы бір-екі жылмен салыстырғанда жоғары болып тұр, — дейді Динара Жайлыбаева.

Маман мысал ретінде «Сығанақ» бекетінің маңындағы баға динамикасын келтірді. Мәселен Сығанақ көшесі мен Қабанбай батыр даңғылының қиылысындағы «Поколение бизнес» тұрғын үй кешеніндегі еуро екі бөлмелі пәтердің құны осы уақыт аралығында шамамен 47 миллионнан 55 миллион теңгеге дейін өскен.

Сарапшының cөзінше, тестілеу кезеңінде жеңіл рельсті көліктің шуы жоқ екені байқалған және сатып алушылардың қызығушылығына кедергі келтіріп отырған жоқ.

— Желі бойындағы аудандарда жылжымайтын мүлік құны көтеріледі деп болжаймыз, өйткені көлік қатынасының қолайлылығы әрқашан локацияның тартымдылығын арттырады. Шуға қатысты алаңдаушылық аз және нарыққа айтарлықтай әсер етіп отырған жоқ. Керісінше кейбір үй иелері бағаның тағы да өсуін күтіп, пәтерлерін қымбатқа сату үшін әдейі кідіріп отыр, — деп атап өтті маман.

Оның айтуынша, нарық қазірдің өзінде бағаның болашақтағы өсімін есепке алып үлгерген.

— Орташа есеппен, егер қазіргі сұраныс сақталса, жүйе іске қосылғаннан кейін баға біртіндеп тағы 10–20 пайызға өседі деп ойлаймын. Желтоқсан айында бір тұрғын үй кешенінен пәтер сатқан болатынмын, қазір ондағы баға екі есеге жуық көтерілді. Бұл LRT маңында тұрудың қолайлы әрі тиімді болатынын көрсетеді, — деді Динара Жайлыбаева.

Естеріңізге сала кетейік, жеңіл рельсті көлік жүйесін тестілеу 29 қыркүйектен бері жүріп жатыр. Оны алдағы айларда толық іске қосу жоспарланып отыр. 

Бұған дейін пойыздар сағатына 40-50 шақырым жылдамдықпен жүретіні хабарланған болатын. 

Бекеттер арасындағы жол жүру уақыты 1,5 минуттан 3 минутқа дейін созылады. Ал «Әуежайдан» соңғы «Нұрлы жол» бекетіне дейінгі барлық 18 станцияны шамамен 40 минутта басып өтуге болады.

Жол жүру құны 200 теңге көлемінде болуы мүмкін.