Астаналық оқушы зағип жандарға арналған ақылды көзілдірік ойлап тапты

Астана қаласындағы Қошке Кемеңгерұлы атындағы №49 мектеп-гимназиясының 10 «А»-сынып оқушысы Қуандық Амирхан ерекше жобасын таныстырды. Ол көру қабілеті нашар және мүлде көрмейтін жандарға арналған ақылды көзілдірік жасап шығарды, – деп хабарлайды  Aikyn.kz.

Жас өнертапқыштың бұл жобасы көзі нашар көретін адамдарға күнделікті өмірде көшеде еркін қозғалып, түрлі кедергілерден сақтануға мүмкіндік береді. Ақылды көзілдіріктің басты ерекшелігі – адамның алдында бір метр қашықтықтан бастап кедергі пайда болғанда, алдын ала қазақ тілінде «Сақтаныңыз, алдыңызда кедергі!» деген дауыстық ескерту жасайды.
Қуандық Амирхан бұл көзілдірікті зағип жандардың қауіпсіздігін қамтамасыз ету мақсатында құрастырғанын айтады. Алдағы уақытта ол жұмыстың ауқымын кеңейтіп, басқа да нұсқамаларды енгізуді көздеп отыр.
Ақылды көзілдірік әлеуметтік маңызы зор жаңалық ретінде қоғамның қолдауына ие болары сөзсіз. Жоба зағип жандардың өмір сүру сапасын арттырып, олардың өз бетімен қозғалуына үлкен септігін тигізбек.

Сараптама, зерттеу мақала, күнделікті өзекті ақпаратты «Айқынның»  TELEGRAM  арнасынан табасыз.