Зағип жандарға көмектеседі

Облыстық көзі көрмейтін және әлсіз көретін азаматтар кітапханасы мүмкіндігі шектеулі азаматтардың уақыт сұранысына сай ізденісіне, рухани тұрғыдан кемелденуіне қолдан келгенше жұмыс істейді. Өңірде 1 облыстық арнайы кітапхана, 9 ауданда көзі көрмейтін және әлсіз көретін азаматтарға арналған бөлімшелер бар.

Мүгедектігі бар демесеңіз, олар­дың ізде­нісі көңіл тоғайтады. Үш мың­ға жуық оқырман көр­кем әде­биет ауы­лынан алыс­та­ған емес. Кітапхана жұмы­сын инклюзивті бағытта ұйым­дастыру үшін маңызды жобалар жүзеге асырылып жатыр. Мүгедектігі бар азаматтарға инклюзия бағы­тында 13 жоба, 2 үйірме жұмыс істейді. «Tiflo-асхана» жобасы аясында «Анама ар­налған ақ дастарқан», «Ин­клюзия және театр» жобасы аясында «Жүрекпен оқыған шығармам» атты алғашқы инклюзивтік театр байқауы ұйымдастырылды. Соңғысына өңіріміздегі зағип балалар мен жасөспірімдер қатысты.

Облыстық көзі көрмейтін және әлсіз көретін азаматтар кітапханасы мүгедектігі бар азаматтарға шектеусіз мүмкіндіктер ұсынып, олар­дың болашаққа деген сенімін ны­ғайту үшін аянбай еңбек етіп келеді. Мұнда мүгедек­тігі бар  4 қызметкер жұмыс істейді.

Әуелі кітапхана оқырманы болған тифология бөлімінің меңгерушісі Ербол Аққайұлы қазір осында еңбек етіп жатыр. Бастапқыда Брайль қарпін үйреніп бастаған еді. Қазір ол кітапхана келушілеріне өз білгенін үйретіп жүр. Ербол әуелі зағип балаларға арналған мектеп оқулықтарын Брайль қарпіне аударуды қолға алды. Кітапхана оқырмандарының сұранысына қарай мерейтой иелерінің шығармаларын ауда­рып, қазіргі таңда екі мыңға жуық кітап тәржімалады.

Ербол Аққайұлының кәсіби шеберлігі мен жұмысына деген сүйіспеншілігі оны саладағы үздік мамандардың біріне айналдырды. Ол зағип жандарға Брайль қарпінде кітаптар ауда­рып қана қоймай, оларға компьютерлік сауаттылықты үйретіп, әрбір оқырманмен жеке жұмыс істеп, оның рухани қажеттіліктерін түсінуге тырысады. Осылайша, Ербол Аққайұлы әлеуметтік инклюзияны ілгерілетуге өз үлесін қосып отыр.

Жамбыл облысы