ЖИ жүргізушілерге көмектеседі

Қарағандыда жүргізушілерге автотұрақтағы бос орын туралы хабар беретін жүйе іске қосылды.

Көше камералары түсірген деректер жасанды интеллект арқылы өңделеді. Кейін оны веб-парақшадан көруге болады. Жүйе сынақтан сәтті өтті.

Автотұрақтарды бақылау жүйесін жергілікті IT-мамандар әзірледі. Қазір ол ірі сауда орталықтары және теміржол вокзалы маңындағы тұрақта қолданылады. Жұмыс істеу тәсілі қарапайым. Көшедегі камералар бос орындарды анықтап, кейін деректер нейрожелі арқылы навигациялық үлгіде өңделеді. Сынақ барысында жүйе сенімді әрі уақытында дәлме-дәл жұмыс істейтінін көрсетті.

Борис Дипнер, жобаны әзірлеушілер тобының мүшесі:

- Жүйе веб-парақша түрінде қолжетімді. Жүргізушілер көлік тұрағының бос немесе толы екенін көре алады. Мысалы, біз хоккей көруге бара жатсақ, сол маңдағы тұрақтың бос орындарын алдын ала қарауға болады. Яғни көлік көп шоғырланған жерге кіріп әбігерге түспейсіз.

Жобаны әзірлеушілер жүйені барынша ыңғайлы ету үшін жетілдіріп жатыр. Болашақта жеке қосымша түрінде жасамақ. Оны Алматыда қолданысқа енгізу жоспарланған. Қарағандылық IT-мамандардың  осындай өміршең жобалары аз емес. Мысалы, жасанды интеллект  жолдардың жағдайын бақылауға да көмектеседі. Ол үшін жедел жәрдем көліктеріне камералар орнатылған. Қазірдің өзінде қалада ақаууы бар 500 учаске табылып, жартысынан астамы жөнделді.

Рүстем Қадыров, жобаны әзірлеушілер тобының мүшесі:

- Жедел жәрдем көлігінде орнатылған камера арқылы жолдарды бақылаймыз. Түсірілген деректер серверде өңделеді. Кейін бұл мәліметтер нейрожелі көмегімен өңделіп, интерактивті карта дайындалады. Мамандар бұрынғыдай әр шұңқырды жаяу жүріп санамайды.

Цифрлық жобалар жол саласынан бөлек, басқа бағыттарда да жүзеге асырылып жатыр. Мысалы, әлеуметтік маңызы бар тауарлардың бағасын автоматты түрде жинақтап, талдайтын жүйе жұмыс істейді. Нейрожелі сауда орталығы сайтындағы мәліметтерді өңдеп, бағаға шолу жасайды.

Константин Ильницкий, Ақпараттандыру, мемлекеттік қызметтер көрсету және мұрағаттар басқармасының басшысы:

- Қарағанды цифрлық жобалар бойынша Астана мен Алматыдан кейін үшінші орында. Тіпті кейбір жобалардың баламасы аталған мегаполистерде жоқ.

Тағы бір цифрлық жүйе Қарағандыдағы көлік кептелісін реттеуге көмектеседі. Заманауи платформа бағдаршамдардың жұмысын автоматты түрде басқарады.

Авторлары: Руслан Нұрланұлы, Сайлау Игіліков, Аман Хамит