Атаулы әлеуметтік көмек көрсетудің жаңа ережесі бекітілді

АСТАНА, 21 қазан – Sputnik. Қазақстанда 2027 жылдың 1 қаңтарынан бастап атаулы әлеуметтік көмек (АӘК) тағайындаудың жаңа ережесі күшіне енеді. Тиісті қаулыға премьер-министр Олжас Бектенов қол қойды.

АӘК мөлшері отбасының жан басына шаққандағы орташа табысы мен тиісті өңірде белгіленген кедейлік шегінің айырмасы негізінде есептеледі. Есептеу кезінде отбасының әрбір мүшесі ескеріледі.

Әлеуметтік көмектің екі түрі болады

Жаңа ережеге сәйкес, атаулы әлеуметтік көмек шартсыз және шартты ақшалай көмек болып екіге бөлінеді.

Шартсыз ақшалай көмек табысы төмен азаматтарға, сондай-ақ I және II топтағы мүгедектігі бар адамдарға тағайындалады.

Сонымен қатар еңбекке қабілетті мүшесі жоқ тұрмысы төмен отбасылар да бұл көмекті ала алады. Егер отбасындағы жалғыз еңбекке қабілетті адам үш жасқа дейінгі балаға күтім жасап отырса, отбасы шартсыз көмек алу құқығына ие болады.

Шартты ақшалай көмек тағайындау үшін әлеуметтік келісімшарт жасасу міндетті болады. Бұл талап көмек алушының жұмыспен қамтылуына және әлеуметтік жағдайын жақсартуға бағытталған шараларды көздейді.

Жаңа ереже 2027 жылдың 1 қаңтарынан бастап қолданысқа енгізіледі.