​Атырау облысында 600 түп ағаш отырғызылып, жүздеген тонна қоқыс жиналды

Атырау облысында 7 мыңнан астам адам World Cleanup Day экологиялық акциясына қатысты. Тазалық жұмыстары кезінде 400 тоннаға жуық қоқыс шығарылып, 600 түп ағаш отырғызылды.

Атырау қаласы мен алты ауылдық округте акцияға мыңға жуық ерікті қосылды. Облыстың жеті ауданында тағы 6 мыңға жуық тұрғын аумақтарды санитарлық тазалауға қатысты. Жұмыстарды жүргізуге 70-ке жуық арнайы техника тартылды.

Тазалық шарасына облыс әкімі Болат Ақшолақов, ардагерлер, мемлекеттік және салалық мекемелердің қызметкерлері, еріктілер мен өңірдің басқа да тұрғындары қатысты.

Отырғызылған ағаштар үшін тамшылатып суару жүйесін ұйымдастыру жоспарлануда. Ақшолақов абаттандыру мен қоршаған ортаға күтім жасау тұрақты жұмысқа айналуы тиіс екенін атап өтті.

«Қоршаған ортаның тазалығына қамқорлық жасау бір күнмен шектелмеуі маңызды. Бұл біздің күнделікті әдетімізге және ортақ жауапкершілігімізге айналуы тиіс», — деді өңір басшысы.

Экологиялық бастама аясында облыста тағы 12 іс-шара өткізу жоспарланған. Олардың қатарында жастардың қатысуымен өтетін «Әлемді тазартамын» акциясы мен «ЭКО-дебаттар» бар.

Кеше, 15:21