Атырау облысында жоғалған жанұя: Диванның өз орнында тұрмағанын көрші бала байқады

Атырау облысында жоғалып кеткен отбасыға қатысты қылмыстық іс бойынша тергеу жалғасып жатыр. Зейнеткер ерлі-зайыптылардың қазасына байланысты олардың кенже қызы мен күйеу баласына халықаралық іздеу жарияланған, деп хабарлайды Arasha.kz.

КТК мәліметінше, мәйіттердің табылуына қатысты тағы бір маңызды жайт анықталған. Марқұмның әпкесі Әдемі Шылмағанбетованың айтуынша, үй ішіндегі күмәнді өзгерісті көрші ауылдың жасөспірім баласы байқаған.

"Бұрын мал союға көмектесіп жүрген көрші бала диванның орнынан жылжып тұрғанын байқайды. Диванды қозғаған кезде астынан мәйіттер табылған. Астына рубероид төселіп, үстіне кілемдер жабылған екен. Інім сол жерді өзі қаза бастағанда адам сүйектеріне тап болған, бірақ өткір иіске байланысты әрі қарай қаза алмаған", – дейді марқұмның әпкесі.

Атырау облыстық полиция департаменті тергеудің жалғасып жатқанын және іздеудегі адамдар саны өзгермегенін растады.

"Екі адамның сүйектері табылғаннан кейін іздеуде төрт адам қалды. Тағы екі жәбірленушіні іздеу жұмыстары тоқтатылған жоқ. Зейнеткерлердің кенже қызы хабар-ошарсыз кеткен адам ретінде халықаралық іздеуде, ал күйеуі күдікті ретінде іздестіріліп жатыр", – деп хабарлады полиция өкілдері.