Атырау облысының құрметті азаматы Есен Тасқынбаев дүниеден өтті

94 жасқа қараған шағында көрнекті мемлекет және қоғам қайраткері, Қазақстанның еңбек сіңірген мұнайшысы, Атырау облысының құрметті азаматы Есен Тасқынбаев дүниеден өтті.

Оның есімі Атырау облысының қалыптасу тарихымен және өңірдің өркендеуімен тығыз байланысты. Есен Тасқынбаев еңбек жолын Құлсары бұрғылау кеңсесінің қарапайым слесарінен бастап, облыстық атқару комитетінің төрағасы мен Қазақ КСР Жоғарғы Кеңесінің депутаты деңгейіне дейін көтерілді. Оның бүкіл саналы ғұмыры туған өлкесінің өзекті мәселелерін шешуге арналды.

Құрметті демалысқа шыққаннан кейін де Есен аға облыстың қоғамдық өмірінен қол үзген жоқ. Ол өңірдің экологиялық жағдайына, инфрақұрылымның түзелуіне және халықтың әл-ауқатына әрдайым алаңдап, билік мінберлерінде өткір мәселелерді көтеріп отырды.

Есен Тасқынбаев замандастары мен кейінгі ұрпақтың жадында туған жері үшін жаны ауырған, жауапкершілігі биік, асқан принципшіл әрі парасатты тұлға ретінде қалды. 

«Ақ Жайық» газетінің редакциясы марқұмның отбасына, туған-туыстары мен жақындарына қайғырып көңіл айтады.

Бүгін, 09:43