​Атырау облысының шаруалары билікке көмек сұрап жүгінді

22 қазан күні Атырау облысының фермерлері ірі сабақты шөпке бөлінетін субсидия мәселесін шешу үшін облыс әкімшілігінің ғимаратына барды.

АШ Министрлігінің "Ауыл шаруашылығы жануарлары басының азығына жұмсалатын шығындар құнын арзандату" бағыты бойынша субсидиялау гидрометереологиялық қызмет растаған (Атырау, Маңғыстау, Қызылорда және Ұлытау облыстарында ауыл шаруашылығы жануарларының аналық басын қоспағанда) азық дайындауға теріс әсер еткен төтенше жағдай жарияланған немесе қалыптан тыс ауа райы жағдайлары болған кезде жүзеге асырылады деген қаулысы енгеннен кейін облыста өткен жылдан бері жемшөпке берілетін субсидия тиылған болатын.

- Өткен жылы шаруалардың атынан екі-үш адам Министрлікке барғанбыз. Бізге егер жергілікті бюджеттің мүмкіндігі болса шешуге болады деген. Алайда жыл аяғында берілер деген үмітіміз ақталмады. Биыл да жемшөпке берілетін субсидия мәселесі бұлыңғыр күйде қалып тұр. Ал Маңғыстау, Қызылорда, Ұлытау облыстарында бұл мәселе оңынан шешілген. Ал бізде нақты ештеңе айтылмай отыр,-деп сынады "Ақиқат" қоғамдық бірлестігінің төрағасы Ғазиз Ғабдуллин.

Айтса айтқандай облыс әкімшілігіне барған шаруалар делегациясын облыстық ауыл шаруашылығы басқармасының басшысы Амангелді САЛАМАТ қабылдап, жиын өткізді.

- Облыста жүздеген шаруа қожалықтары бар. Биыл мал жайылымы жер қуаң, шөп шықпады десе болады. Жауын-шашын аз болды, салдарынан шөптерді сырттан сатып алуға тура келді. Өткен жылы көршілес Өзбекстан республикасы кәсіпкерлері келіп, семіз, қоңды малдарымызды сатып алып кетті. Ендігі қолда бары шамалы, мал жайылысы жұтаң болып тұр. Қыстан шыға алмай қаламыз ба деген қауіп бар,-дейді шаруа қожалығының басшысы Теңелсін ҚҰБАЙ.

Шаруагерлер бір ғана талап қойды, ол-ірі сабақты шөпке берілетін субсидия мәселесін шешу. Жиында облыстық ауыл шаруашылығы басқарма басшысы А. Саламат мал азығының шығынын субсидиялау жергілікті бюджеттен қосымша бюджет қаражаты бөлінген және бюджет қаражаты жеткілікті болған кезде жүзеге асырылатынын айтты. Бірақ оның жауабы фермерлерді қанағаттандырған жоқ. Сол себептен кездесу 7 қараша күнге қалдырылды. 

Ләззат ҚАРАЖАНОВА

Бүгін, 18:32