Атырауда 1000 нан астам мопед тіркелді

Атырау облысында мопедтерді міндетті мемлекеттік тіркеу жұмыстары жалғасуда. 

Өңірлік коммуникациялар қызметінің мәліметінше, бүгінгі күнге дейін мамандандырылған халыққа қызмет көрсету орталықтары арқылы 1033 мопед ресми есепке қойылған.

Заңға сәйкес мопедтер механикалық көлік құралдары санатына жатады. Сондықтан оларды тіркеу, мемлекеттік нөмір алу және «А1», «А» немесе «В» санатындағы жүргізуші куәлігін иелену міндетті.

Тіркеусіз немесе жүргізуші куәлігінсіз мопед басқарғандарға Әкімшілік құқық бұзушылық туралы кодекс бойынша жауапкершілік қарастырылған. Мәселен, жүргізуші куәлігінсіз көлік басқарғаны үшін 86 500 теңге айыппұл салынады.

Полиция қызметкерлері тұрғындарды заң талаптарын сақтап, мопедтерін уақытылы тіркеуге шақыруда. Облыс аумағында профилактикалық және рейдтік іс-шаралар тұрақты өткізіліп, тіркеусіз жүрген мопед иелеріне қатысты шаралар қабылдануда.

Жыл басынан бері өңірде мопедтердің қатысуымен 15 жол-көлік оқиғасы тіркеліп, 22 адам жарақат алған. Әкімшілік полиция басқармасының Процессингтік орталығының басшысы, полиция майоры Жеңіс Дәулетовтің айтуынша, мопедтерді міндетті тіркеу көлік құралдарының есебін жүргізуге ғана емес, жол қозғалысы қауіпсіздігін арттыруға да ықпал етеді.

Бүгін, 12:43