Атырауда көлік жүргізу құқығынан айырылғандар ұсталды

Атырауда Жедел басқару орталығының бейнебақылау камералары жүргізу құқығынан айырылған төрт адамның қайтадан көлік тізгіндегенін анықтады, деп хабарлайды Polisia.kz.

Облыстық полиция департаменті жанындағы орталық тәулік бойы қоғамдық тәртіпті қадағалап, көлік қозғалысын бақылап отырады. Бір күн ішінде камералар арқылы төрт түрлі жағдайда жүргізушілердің заң бұзғаны белгілі болды.

Алдымен Құрманғазы көшесінде жол ережесін бұзған Mitsubishi көлігінің 40 жастағы жүргізушісі тоқтатылып, оның сот шешімімен жүргізу құқығынан айырылғаны анықталды. Кейін Абай мен Канцев көшелерінің қиылысында Toyota көлігінің жүргізушісі ұсталды. Сағат 13:37-де Құрманғазы көшесінде ВАЗ 2115 тоқтатылып, 52 жастағы жүргізушінің де көлік жүргізу құқығы жоқ екені белгілі болды. Ал сағат 16:13 шамасында Бейбарыс көшесінде Toyota Ipsum көлігінің жүргізушісі ұсталып, оның да сот шешімімен көлік жүргізу құқығынан айырылғаны анықталды.

Барлық құқық бұзушыларға қатысты заңға сәйкес шаралар қабылданды. Полиция жүргізу құқығынан айырылған адамдардың қайтадан рөлге отыруы жолдағы қауіпсіздікке тікелей қатер төндіретінін ескертті.

Бүгін, 11:33