Атырауда жасөспірімдер төбелесіне байланысты тергеу басталды

Атырау қаласында екі қатарласын ұрған төрт жасөспірім ұсталды. Оларға қатысты қылмыстық іс тіркеліп, тергеу жүріп жатыр, деп хабарлайды Egemen.kz.

Фото: Polisia.kz

Жасөспірімдердің төбелескені туралы видео әлеуметтік желіде тарады. Осыған байланысты облыстық полиция департаментінің баспасөз қызметі төмендегідей ақпарат берді.

«Екі жасөспірімге қасақана дене жарақатын келтірген 4 күдікті анықталып, полиция бөліміне жеткізілді. Жасөспірімдердің кәмелетке толмауына байланысты заңды өкілдерінің қатысуымен жауап алынатын болады. Қылмыстық іс тіркеліп, кешенді тергеу амалдары басталды. Қазір аталған оқиғаның барлық мән-жайы анықталып жатыр», деп хабардар етті департаменттің баспасөз қызметі.

Сондай-ақ, құқық бұзушылық жасаған жасөспірімдер ішкі істер органдарының есебіне алыналды. Оларға қатысты іс құжаттары кәмелетке толмағандардың ісі жөніндегі комиссияға ұсынылатын болады.