​Атыраудағы қоқысқа толы пәтер: балалардың жағдайы не болады?

22 қазан 2025 жылы Атырау қаласы Вокзал маңы ықшам ауданында орналасқан қоқыс қалдықтарына толы пәтерден кәмелетке толмаған 2020 жылы туылған Г.Ю есімді қыз бала және 2023 жылы туылған Т.Д есімді ұл бала анықталды, деп хабарлады Атырау облысының Білім беру басқармасы.. 

Кәмелетке толмағандардың құқықтарын қорғау мақсатында жас ерекшеліктеріне байланысты қыз бала Атырау облысы Білім беру басқармасының «Кәмелетке толмағандарды бейімдеу орталығына», ұл бала Атырау облысы Денсаулық сақтау басқармасының «Мамандандырылған балалар үйіне» орналастырылды.

Кеше басқарма басшысының орынбасары Л. Меңдіғалиева орталыққа барып, кәмелетке толмаған қыздың жағдайымен танысты. Дәрігердің қорытындысына сәйкес, баланың денсаулығы қалыпты, сөйлеуінде тежелу бар екендігі анықталды.

ҚР Білім және ғылым министрінің 2025 жылғы 31 наурыздағы № 59 бұйрығына сәйкес, қыздың заңды мүдделері қорғалып, қажетті көмектер көрсетілуде.

Бұл мәселесі бойынша Атырау қалалық Кәмелетке толмағандардың істері және олардың құқықтарын қорғау жөніндегі комиссиясына ұсыныс жолданып, отырыста қаралатын болады.

Еске сала кетейік, Атырау қаласында қоқыс пен тарақанға толы пәтер табылған еді. Пәтердің ішінде ескі заттардың үйіндісі, қалдықтарға толы пакеттер және ұзақ жылдар бойы жиналған қоқыс болған. Төбеде қараңғыда жыбырлаған тарақандардың шоғырын көруге болады.

Бүгін, 11:48