Атыраудағы жаңа медициналық пункт 8 айдан кейін ғана жұмысын бастады

Медициналық нысанның ресми ашылу салтанатына 14 ақпан күні Денсаулық сақтау бірінші вице-министрі Тимур Сұлтанғазиев пен облыстық денсаулық сақтау басқармасының басшысы қатысқан. Алайда көп ұзамай жабылып қалған. Оған ғимараттың инженерлік желілерге толық қосылмауы себеп болған.

Облыстық құрылыс, сәулет және қала құрылысы басқармасының бас маманы Ернар Қадірбайдың айтуынша, нысанның ғимараты мен инженерлік инфрақұрылымының жобасы бөлек дайындалған. Бұл жұмыстардың бір-бірімен үйлеспеуіне, яғни желілер кейін жүргізілген.

— Салтанатты ашылу рәсімі өткен. Алайда Құрманғазы ауданында су уақытпен беріледі. Негізгі құбырда су болмағандықтан, пунктке су кесте бойынша жіберілді. Сонымен қатар, жылу қазандарынан ақау шықты. Ғимаратты электр көзімен қамту үшін жасалатын келісімшарт та уақытылы жасалмаған. Қазіргі уақытта барлық мәселе шешілді, — деді Ернар Қадірбай.

Бұл нысанға 150 миллион теңге қаражат жұмсалған. Дегенмен, тұрғындарды қабылдауға толық дайын емес мекеменің салтанатты түрде ашылуы қоғамда көптеген сұрақ туғызды. «Бұл шара кім үшін өткізілді?» деген сауалға облыстық денсаулық сақтау басқармасы тарапынан нақты жауап болмады.

— Аталған медициналық нысанды халыққа медициналық көмекті жақсарту үшін пайдалануға беру мақсатында оның ресми ашылуы өткен. Алайда кейін нысанда бірқатар техникалық және инженерлік талапқа сәйкес келмейтін ақау анықталып, соның салдарынан медициналық пунктінің қызметі уақытша тоқтатылды. Атырау облысы Денсаулық сақтау басқармасы тарапынан бұл мәселеге бейжай қарау болмағанын атап өтеміз. Мердігер ұйымға құрылыс барысында анықталған кемшіліктер бойынша тиісті ескертпелер жасалып, оларды жою талап етілді. Қазіргі таңда аталған ескертпелердің барлығы жойылып, нысандар теңгерімге қабылданды. Қазіргі таңда барлық техникалық және инженерлік ескертпе толықтай жойылып, нысан өз қызметін қалыпты режимде жалғастырып жатыр, — деп хабарлады облыстық денсаулық сақтау басқармасының баспасөз қызметі.

8 айға созылған үзілістен кейін 2025 жылдың 16 қазан күні пункт ресми жұмысын бастады.

Айта кетейік, «Ауылдық денсаулық сақтауды жаңғырту» ұлттық жобасы аясында Атырау облысында 2023-2025 жылдар аралығында 18 медициналық нысан салу жоспарланған. Бүгінгі күнге дейін олардың 15-інің құрылысы аяқталған.

Қазіргі таңда Құрманғазы ауданына қарасты Жамбыл, Әліпова, Жалғызапан, Жасталап және Арна ауылдарындағы жаңа медициналық мекемелерді балансқа беру процесі жүріп жатыр. Ал қалған 3 нысанның құрылысы жалғасып жатыр. Жергілікті билік бұл жұмыстарды жыл соңына дейін толық аяқтауды жоспарлап отыр.