Атыраудан көшкен оқушының анасы буллинг пен бопсалауға тап болғанын мәлімдеді

Жаңа мектепте соққыға жығылғаннан кейін бала ауруханадан бір шықты, ал бастан өткерген күйзелісі оның денсаулығына кері әсер еткені сонша, тіпті оған психологтың көмегі қажет болды.

Отбасы Атыраудан Батыс Қазақстан облысының Орал қаласынан шамамен 60 шақырым жерде орналасқан Өркен ауылына көшіп барған. Атасы қайтыс болған соң, әжесінің қасына жақын орналасуды ұйғарған. Ұлы 2026 жылдың ақпан айында жергілікті мектепке орналасып, оқуын жалғастырды. Алайда анасының айтуынша, сәуір айында-ақ оның басқа оқушылармен арада келіспеушілік туындай бастаған. 

Анасы баласының бастан кешіргенін «НеМолчиKZ» қоғамдық қорына айтып берді. Оның айтуынша, оқушылар ұлына үнемі тиісіп жүрген, ал жаңа оқу жылы басталысымен жағдай тіпті ушығып кеткен. Анасының сөзінше, 17 қыркүйекте 11-сынып оқушысы бірден төрт оқушыны, соның ішінде оның ұлын соққыға жығып, балалардан ақша талап еткен.

Ата-анасы бұл туралы бірден білген жоқ. Бала тамақ ішпей қалған, көмей аймағының ауырсынуына, есту қабілетінің төмендеуіне, тыныс алудың қиындауына шағымданған, одан бөлек балада үрей мен қорқыныш пайда болған. Екі апта бойы оның денсаулығы қатты алаңдаушылық туғызған, отбасы екі рет жедел жәрдем шақырғанымен, бала мектепте соққыға жығылғаны туралы тіс жармаған. Тек кейінірек ол фельдшерге біреу өзін ұрғанын мойындап, ауырсынудың себебі осыдан болуы мүмкін бе деп сұраған.

Қыркүйектегі оқиғадан кейін оқушы аптаға жуық ауруханада жатқан. Алайда емдеу мекемесінен шыққанымен іс аяқталған жоқ: бала мектепке қайта барудан әлі де қатты қорыққан, ал анасының айтуынша, психолог оның бойынан өзіне өзі қол салу туралы ойларды анықтаған. Қазір бала емдеуді жалғастырып жатыр, психологиялық көмек алып, сабақты қашықтан оқып жатыр.

Жағдайдың шешімін таппаған анасы Оқу-ағарту министрлігі мен Бас прокуратураға жүгінді. Бұл оқиға баласының басынан өткен жайтты анасы айтып берген «НеМолчиKZ» қорының жарияланымынан кейін көпшілікке тарады.

Батыс Қазақстан облысының полиция департаменті аталған дерек бойынша тергеу жүріп жатқанын растады. Құқық қорғау органдары оқушылардың қалай соққыға жығылғаны және ақша бопсалау туралы арызды тексеруі тиіс.

Анастасия ШЕРСТЯНКИНА

Бүгін, 12:10