Көршілер естілсе: пәтердегі шуды оқшаулауға не әсер етеді?

"Үстіңгі қабаттағылар тағы тарсылдатып жатыр", "Көршілердің сөйлескені естіледі", "Қабырғалар картонннан жасалғандай" - мұндай мәселелерге көппәтерлі үйлердің тұрғындары жиі кезігеді. Біз жақында осы туралы жазған едік. Бірақ мәселе әрдайым қабырғаның қалыңдығында емес. Пәтердің іші қаншалықты тыныш болатынына көптеген фактор әсер етеді: қабырға мен жабын конструкциясы, материалдар, монтаждау сапасы, конструкциялардың түйіскен жері, кейде қарапайым розетка мен терезелер де маңызды рөл атқарады.

Поделиться

Біздің шуды оқшаулау жөніндегі сарапшымен пәтердегі шу қайдан шығатыны, неге қалың қабырға әрдайым көмектесе бермейтіні және жөндеуге дейін нені тексеруге болатыны туралы сөйлестік.

Шудың бірнеше түрі болады

Алдымен шудың қандай түрлері болатынын анықтап алайық. Акустика саласындағы аккредиттелген тәуелсіз сынақ зертханасының басшысы Алмат Тасболаттың айтуынша, үйде негізінен шудың екі түрі болады - ауа арқылы таралатын және құрылымдық шу.

Ауа арқылы таралатын шу дыбыс толқындары түрінде ауамен таралады. Бұл - бізге үйреншікті әңгімелесу, музыка, жұмыс істеп тұрған теледидар, шаңсорғыш, баланың айқайы немесе жылағаны.

Құрылымдық шу ғимарат конструкциялары арқылы берілетін дірілден пайда болады. Оның ең көп таралған түрі - соққы шуы. Мысалы, жоғарғы қабаттағы көршілер жүргенде, еденге бірдеңе түсіріп алғанда немесе жиһазды жылжытқанда естіледі.

Фото: depositphotos.com

"Ауа арқылы таралатын шу дыбыстық қысымнан, ал соққы шуы тікелей механикалық әсерден туындайды. Сондықтан олардан қорғану үшін әртүрлі конструктивтік шешім қолданылады", - дейді сарапшы.

Мысалы, соққы шуын басу үшін демпфер - дірілдің бір конструкциядан екіншісіне тікелей берілуіне жол бермейтін арнайы материалдар қолданылады. Алмат Тасболаттың айтуынша, олар еден төсемі мен қабырға арасына немесе профиль мен қабырға арасына төселеді.

Ал ауа арқылы таралатын шуды азайту үшін дыбыс оқшаулағыш материалдар қолданылады: акустикалық минералды мақта, термодыбыс оқшаулағыш немесе арнайы панельдер.

Қабырғаның қалыңдығы басты көрсеткіш емес

Қабырға неғұрлым қалың болса, шу соғұрлым аз болады деген пікір қисынды көрінуі мүмкін. Бірақ бұл әрдайым олай емес.

Дыбыс оқшаулауға бір ғана параметр емес, конструкция мен материалдар сипаттамаларының жиынтығы әсер етеді. Дұрыс жобаланған көпқабатты жүйе қалың бірқабатты конструкцияға қарағанда тиімді болуы мүмкін, деп түсіндіреді сарапшы.

Шартты түрде оны құрылыс "бәліші" ретінде елестетуге болады: әр қабат өз міндетін атқарады - бірі дыбысты қайтарады, екіншісі дірілді жұтады.

Мысалы, BI компаниясы өз үйлерінде Acoustic Pro жүйесін қолданады. Бұл бес қабаттан тұратын конструкция: екі қабат гипсокартон, акустикалық минералды плита, газблок және келесі жағынан тағы бір акустикалық минералды плита мен екі қабат гипскартон.

Acoustic Pro жүйесінің макеті. Фото: Нұрлан Алжабаев

"Нәтижесінде дыбыс бір қалың қабырғаға тіреліп қалмай, қасиеттері әртүрлі бірнеше материалдан өтеді. Мұндай жүйе ең алдымен ауа арқылы таралатын шудан - сөйлесуден, теледидардан, музыкадан қорғауға арналған", - дейді сарапшы.

Анықтама: Acoustic Pro - бұл BI Group компаниясы Оңтүстік Кореяның Daewoo E&C компаниясымен бірлесіп әзірлеген пәтераралық шуды күшейтілген оқшаулау және дыбыс жұтатын қалқалар технологиясы.

Ал көршінің жүргенін, жиһаз жылжытқанын немесе заттарды құлатқанын естімеу үшін компанияда басқа жүйе - "жүзбелі еден" қолданылады. Мұнда еден төсемі жабын плитасымен және қабырғалармен тікелей жанаспайды: олардың арасында акустикалық минералды плита, ал периметрі бойынша демпфер таспа орналасады. Мұндай конструкция ғимарат бойымен дірілдің берілуін азайтады.

BI сарапшысы Acoustic Pro жүйесінің макетін көрсетіп жатыр. Фото: Нұрлан Алжабаев

Неге розетканы пәтердің "құлағы" деп атайды?

Розетка пәтерді шулы қылмайды. Мәселе розетка қорабы саңылаумен орнатылса немесе дұрыс бекітілмесе туындайды.

Бұл жағдайда конструкцияда әлсіз тұс пайда болып, ол арқылы көрші бөлмеден дыбыс өтуі мүмкін.

Әсіресе пәтераралық қабырғалардағы розеткаға назар аудару өте маңызды. Егер розетка қораптары бір-біріне қарама-қарсы орналасса, ал олардың айналасындағы кеңістік жеткілікті деңгейде нығыздалмаса, дыбыс конструкция арқылы оңай өтеді. 

Фото: depositphotos.com

Тыныштық жөндеуден басталады

Сапалы дыбыс оқшаулау - бұл кілтті алғаннан кейін пәтерге "қоса салуға" болатын дүние емес. Негізгі шешімдер жобалау және құрылыс кезеңінде қаланады, дейді Алмат Тасболат. Материалдар мен конструкцияларды қолданыстағы құрылыс талаптарын ескере отырып таңдау керек.

Бірақ дұрыс жобаланған жүйенің өзін монтаждау немесе кейінгі жөндеу кезінде бүлдіріп алуға болады. Мынадай негізгі ережелерді сақтаған жөн:

Қабырғаларды әрлеу және соңғы қабаттарды монтаждау кезінде бастысы - дыбыстың оқшаулауды айналып өтуіне мүмкіндік беретін байланысты байқаусызда жасап алмау қажет. Еден жабынын, мейлі ол ламинат, паркет немесе плитка болсын, төсеу кезінде материалды қабырғаға тақап салмау керек, ал плинтусты "жүзбелі" тегістегіш дербестігін сақтау үшін еденді қыспай, тек қабырғаға бекіту қажет. Егер еденге плитка төселсе, қабырға мен еден кафелі арасындағы түйіскен жерлер тек серпімді силиконды герметикпен толтырылады. Әдеттегі қатты ерітінді дыбыс өткізгішке айналып, оны жабын арқылы таратуы мүмкін. Егер пәтеріңізде Acoustic Pro жүйесі болса, ауыр шкафт пен теледидарды акустикалық қалқаға қарапайым дюбельмен бекітпеңіз, тек арнайы акустикалық бекіткіштерді немесе алдын ала қарастырылған тетіктерді пайдаланыңыз. Әйтпесе, қалқа қабаттары бір-бірімен байланысып, дыбыс оқшаулау деңгейі төмендеуі мүмкін. Розеткаларды жобада жоқ жерлерге қоспаңыз. Розетка орнату үшін қабырғаны тесу керек, бұл Acoustic Pro көпқабатты құрылымының тұтастығын бұзып, дыбыс өтетін саңылау жасауы мүмкін. Құбырларға назар аударыңыз. Құбырлар еденнен өтетін жерлерде олар тегістегішпен  тікелей жанаспауы керек. Оларды арнайы демпфер материалмен орау қажет - бұл дыбыс пен дірілдің еден арқылы таралуын болдырмауға көмектеседі.

Сарапшы психологиялық бейімделу әсерін де ескеруге кеңес береді: жеке үйден көшіп келген тұрғындарға көппәтерлі үйдің қала сыртындағы тыныштықтан өзгеше, табиғи фондық ырғағына үйрену үшін біраз уақыт қажет болады.

Фото: depositphotos.com

Шу қайдан шығып жатқанын қалай білуге болады?

Әрине, пәтерге көшіп келгеннен кейін де қосымша дыбыс оқшаулауын жасауға болады, бірақ алдымен шудың көзін анықтау маңызды.

Қабырғаның арғы жағынан көршілердің әңгімесі, музыка немесе теледидар дауысы естілсе - бұл пәтераралық қалқа арқылы ауа шуының таралуы болуы мүмкін. Үстіңгі қабаттан аяқ дыбысы, соққы немесе заттардың құлауы естілсе - шу көзі жабын арқылы берілетін соққы шуымен байланысты болуы ықтимал. Көшеден үнемі көліктердің шуы немесе басқа да дыбыстар естілсе - терезелерге, олардың конструкциясына және нығыздағыштардың сапасына назар аударған жөн. Шу бірнеше жерден шығып жатқандай сезілсе - дыбыс түйіскен жерлер, жабындар және басқа да құрылымдық элементтер арқылы таралуы мүмкін.

Бұл кәсіби диагностиканы алмастыра алмайды, бірақ мәселенің қайда екенін түсінуге көмектеседі.

Шудың нақты көрсеткіштерін аккредиттелген зертхананы тарта отырып, арнайы сынақ кезінде анықтауға болады, деп түсіндіреді сарапшы. Өлшеу нәтижелері децибелмен көрсетіледі. Бұл шкала дыбыс деңгейі мен дыбыс оқшаулау көрсеткіштерін салыстыруға мүмкіндік береді.

"Қолданыстағы талаптарға сәйкес, тұрғын үй санатына байланысты ауадағы шуды оқшаулау индексі кемінде 50, 52 немесе 54 дБ, ал келтірілген соққы шуының индексі 60, 58 немесе 55 дБ-ден аспауы керек", - дейді Алмат Тасболат.

Фото: depositphotos.com

Пәтер сатып алу кезінде тексеру керек бес тармақ Қабырға мен қалқа.
Бос тігістер болмауы керек. Сондай-ақ қалқалардың жабын плитасына түйісетін жерлеріндегі тігістердің тығыздалу сапасын тексеру маңызды. Техникалық саңылау.
Кәріз тірек құбыры өтетін жерге ерекше назар аудару қажет. Ол дұрыс және герметикалық түрде бекітілуі тиіс. Демпфер таспа.
Еден тегістегіші мен қабырғалардың арасында демпфер таспа қарастырылуы керек. Ол соққы шуының тікелей ғимарат конструкцияларына берілмеуіне көмектеседі. Қалқа.
Оларда бос тігістер мен тұтастықтың басқа да бұзылуының бар-жоғын тексерген жөн. Терезе.
Нығыздағыш резеңкенің бар-жоғын және күйін тексеріңіз. Саңылау арқылы көшедегі дыбыс пәтерге оңай кіреді. 

Ал сіздің пәтеріңізде бөгде шу естіле ме?

Бізді Google-дың негізгі дереккөздер тізіміне қосыңыз

Қосу

пәтер көрші