Ауа сапасы орташа: әкімдік өскемендіктердің тұманға қатысты шағымдарына жауап берді

АСТАНА, 2 ақпан – Sputnik. 2 ақпанда Өскемендегі 0-11 сынып оқушылары қайтадан қашықтықтан оқуға көшірілді.

Алты күннен бері облыс орталығында "қолайсыз метеорологиялық жағдай" байқалып отыр.

Өскемен тұрғындарының ауа сапасының нашарлығы мен тұманға қатысты көптеген шағымынан кейін Шығыс Қазақстан облысының әкімдігі экология департаментінің мамандары ауа сапасын тексеру жұмыстарын жүргізгенін хабарлады.

"Ауа сапасы орташа деп бағаланды және аймақ тұрғындарының денсаулығына қауіп төндірмейді", - деп хабарлады жергілікті билік тексеруден кейін.

Әкімдікте жалпы ауа сапасына көліктер, өнеркәсіптік кәсіпорындар және пешпен жылытылатын жеке үйлер әсер етеді деп хабарлады. Сонымен қатар екі су электр станциясының болуы Ертіс пен Үлбі өзендерінің қыста қатып қалуына жол бермейді, бұл қою тұманның пайда болуына себеп болып отыр.

"Қыс мезгілінде жеке секторда қатты отынды (көмір және ағаш) жағу күйе мен күлден тұратын ұсақ бөлшектердің пайда болуына әкеледі, олар ауада ұзақ уақыт сақталады және ауаның ластану деңгейіне айтарлықтай әсер етеді", - деп хабарлады облыстық әкімдікте.

Билік өкілдері қалада екінші дәрежелі қолайсыз метеорологиялық жағдайлар сақталып отырғанын айтты.