Ауру жеңіп кетті... Елімізге танымал актрисаның отбасы қара жамылды (ФОТО)

Елімізге белгілі актриса әрі блогер Таня Турлай ауыр қайғыға ұшырады. Өнер иесінің әкесі өмірден өтті, деп хабарлайды Ozgeris.info.

Қаралы хабарды актрисаның өзі әлеуметтік желідегі парақшасында бөлісті. Ол әкесін өміріндегі ең мейірімді әрі көңілді жан ретінде еске алып, оған деген сағынышы мен сүйіспеншілігін жүрекжарды сөзбен жеткізді.

"Әкем – мен үшін бұл өмірдегі ең мейірімді, ең күлкілі адам еді. Әзілді де, өмірге жеңіл қарауды да сол кісіден үйрендім. Бүгін менің әкем жоқ. Бірақ мен оны шексіз жақсы көремін. Ол ең керемет әке болды", – деп жазды актриса.

Марқұмның ұзақ уақыт бойы қатерлі ісікпен күрескені белгілі болды. Таня Турлай әкесінің қарапайым да адал ғұмыр кешкенін, өмір бойы еңбек етіп, бар жүрегімен отбасын сүйгенін атап өтті. Оның айтуынша, өткен жылы әкесінің денсаулығы күрт нашарлап, отбасы ауыр сынақтан өткен.

"Біз ешкімге тілемейтін жолдан өттік. Соңғы демге дайын болу мүмкін емес екен. Соңына дейін жанында болдық. Өмірдегі ең ауыр нәрсе — ең жақын адамыңның қалай кетіп бара жатқанын көру. Обыр жеңді", – деп жазды ол.

Сондай-ақ актриса әкесінің адамгершілігі, қарапайымдылығы мен отбасына деген үнсіз, бірақ шынайы махаббатын ерекше ықыласпен еске алды. Оның сөзінше, әкесі табиғатты, биді, музыканы жақсы көрген, балаларына әрдайым мақтанышпен қараған жан болған.

"Оны таныған әр адам Сашка Турлайды ешқашан ұмытпайды", – деп түйіндеді ол.