Балам терезеден құлап кетті : елордада әйел әріптестерін алдап, Түркияда демалып қайтқан

АСТАНА, 13 қазан - Sputnik. Елорда тұрғыны ойдан шығарылған оқиға айтып, әріптестерін алдаған, деп хабарлайды Polisia.kz.

Астанада полиция қызметкерлері 31 жастағы әйелді жеке пайдасы үшін әріптестерінің сенімін теріс пайдаланғаны үшін жауапкершілікке тартты.

"Декреттік демалыста жүрген әйел өз басшысына хабарласып, ойдан шығарылған қайғылы оқиға туралы айтқан. Ол баласы терезеден құлап, жансақтау бөлімінде жатыр деп мәлімдеген. Әріптестері жанашырлық танытып, ем-домға көмек ретінде ақша жинап берген", - деп жазылған хабарламада.

Алайда көп ұзамай шындық анықталды. Әріптестерінің бірі оның жұбайына хабарласып, жағдайды сұрағанда, ер адам баласының аман-есен екенін айтып, әйелінің айтқан сөзін жоққа шығарған.

Тексеру барысында әйелдің жиналған қаражатты жеке қажетіне жұмсағаны, соның ішінде Түркияға демалысқа барғаны анықталды.

Алаяқтық дерегі бойынша құқық қорғау органдары жедел тексеріс жүргізіп, күдіктіге қатысты қылмыстық іс қозғады.