Белгілі актер Балтабай Сейітмамытұлы 76 жасқа қараған шағында көз жұмды

Қазақстанның еңбек сіңірген қайраткері, "Құрмет" орденінің иегері, белгілі актер әрі режиссер Балтабай Сейітмамытұлы 76 жасқа қараған шағында дүниеден озды, деп хабарлайды Arasha.kz.

Марқұмның қайтыс болуына байланысты ҚР Мәдениет және ақпарат министрлігі оның отбасы мен жақын туыстарына, сондай-ақ барша қалың жұртшылыққа көңіл айтып, қайғыға ортақтасты.

Министрлік таратқан көңіл айту жеделхатында Балтабай Сейітмамытұлының қазақ сахна өнеріндегі айрықша орны атап өтілген.

"Балтабай Сейітмамытұлы саналы ғұмырын ұлттық театр өнеріне арнаған бірегей тұлға болды. Ол Ғабит Мүсірепов атындағы Қазақ мемлекеттік балалар мен жасөспірімдер академиялық театры мен Мұхтар Әуезов атындағы Қазақ ұлттық драма театры сахналарында классикалық әрі заманауи драматургияның үздік үлгілерін терең философиялық оймен, жоғары актерлік мәдениетпен сомдап, ұлттық мәдениеттің дамуына өлшеусіз үлес қосты. Оның жарқын бейнесі мен бай шығармашылық мұрасы халқымыздың жадында мәңгі сақталады", – делінген хабарламада.

Балтабай Сейітмамытұлы 1950 жылдың 11 сәуірінде Алматы облысы Жамбыл ауданына қарасты Қастек ауылында дүниеге келген. Ол актерлік және режиссерлік қызметімен қатар, әдеби салада да қалам тербеп, "Жүрегім ашық жақсыға" атты кітаптың, сондай-ақ бірқатар спектакльге арналған рецензиялардың авторы ретінде танылды.

Өнер иесі сахнада көптеген жарқын бейнелерді сомдады. Оның репертуарында Ілияс Есенберлиннің «Ғашықтар» пьесасындағы Амантай, Едуард Ерубаевтың "Менің құрдастарым" шығармасындағы Рахмет, Сәбит Жүнісовтің "Жаралы гүлдеріндегі" Военком, Антон Чеховтың "Шағаласындағы" Тригорин, Шыңғыс Мұртазаның "Бесеудің хатындағы" Иванов, Уильям Шекспирдің "Даулы түнгі думанындағы" Тизей, Мұхтар Әуезовтің "Абай" трагедиясындағы Айдар бейнелері бар.

2002 жылы Қазан қаласында өткен халықаралық түркітілдес елдер театр фестивалінде Иран-Ғайыптың "Қорқыттың көрі" аңыз-дастанындағы Қорқыт рөлі үшін "Ең үздік ер адам бейнесі" аталымында лауреат атанып, "Алтын қанатты адам" сыйлығын иеленді. Бұл оның халықаралық деңгейде мойындалған шебер актер екенін айқындай түсті.