Белсенділігі жоғары науқан

Биыл Жетісуда ауыл әкімдерін сайлау науқаны ерекше өтті. Аудандық маңызы бар қалалар, ауылдар мен ауылдық округтерді басқаратын 116 әкімнің қатарын жасақтау мақсатында 39 ауылдық округ әкімін сайлау жоспарланған. Алайда кейбір әкімдердің отставкаға кету туралы өтініш беруіне байланыс­ты 42 округ әкімі сайланды.

Осылайша, биылғы он бір ай ішінде облыстың 10 ауданы­ның ішінен 8 аудан мен 1 қалада 42 сайлау науқаны ұйым­дас­ты­рылды. Олардың 39-ы – әкім­дердің өкілеттік мерзімінің аяқ­талуына, үшеуі мерзімінен бұ­рын тоқтатылуына байланыс­ты өткізілді. Осылай сайланған әкім­нің бірі – Көксу ауданына қарасты Бал­пық ауылдық округінің әкімі Төлеген Қожабеков.

«Халықтың пікірі қашанда маңызды. Осы ауылдың азаматы болған соң бағымды тағы бір рет сынап көрейін дедім. Ауыл тұрғындары қолдады. Қазір округіміз ерекше дамып келеді. Жол мәселесі де шешімін тапты. Көгілдір отын келді. Халықтың арыз-өтініші қалыс қалып жатқан жоқ», дейді ауыл әкімі.

Сайлау үдерісіне облыстық, 9 аудандық және қалалық аумақ­тық сайлау комиссиялары мен 98 учаскелік комиссия жұ­мыл­дырылып, жалпы 632 мүше­ден тұратын ұйымдастыру құ­рылымы жұмыс істеді. Сай­лаушылар тізіміне 82 269 адам енгізіліп, оның 66 831-і дауыс­ беруге келді. Нәтижесінде, қа­тысу көрсеткіші 81,2 пайызды құрап, ауылдық жерлердегі саяси бел­сенділіктің әлі де жоғары екенін көрсеткен.

«Одан бөлек, өңірде үміткер­лерді ұсыну кезеңі де тартысты өтті. 42 округ бойынша барлығы 151 кандидат ұсынылып, олардың 84,6 пайызы – өзін-өзі ұсынған азаматтар болды. Ал саяси партиялар тарапынан 23 үміткер тіркелді, оның 21-і «Amanat» партиясынан, екеуі – Қазақстан Халық партиясынан. Жалпы алғанда, бір орынға орташа есеппен 3,6 кандидаттан келіп, сайлаудың бәсе­келестік деңгейі айтарлықтай жоғары болды. Ең көп үміткер Ақсу ауданының Ақсу ауылдық ок­ругінде тіркеліп, ол жерде бір орын­­ға алты адам таласты. Ал ең тө­мен бәсекелестік деңгейі 8 аудан­­­­ның 22 округінде байқалды, әр­­­қай­­сысында 3 үміткерден ғана ұсы­нылды», дейді Жетісу облы­сының аумақтық сайлау ко­мис­сиясының төрағасы Тимур Даутов.

Оның айтуынша, 30 нау­рызда Панфилов аудандық мәс­лихатында шығып қалған орын­ға 1 депутат сайланды. Сай­­­лау­ға 2 аумақтық сайлау комис­сия­сы, 1 округтік сайлау комис­сиясы, 3 учаскелік сайлау комиссиясы, барлығы 39 комиссия мүшесі қатысты. Сайлаушылар тізіміндегі саны – 5 370, дауыс беруге қатысқандар – 3 942. Бұл өте жақсы көрсеткіш саналады.

Оның айтуынша, үміткерлер­дің бірқатары әртүрлі себептермен сайлау үдерісінен шет­те­тілді. Барлығы 25 кандидат тізімнен алынып, олардың 12-сі мемлекеттік қызмет туралы заң талаптарына сәйкес келмеген. Тағы 9 адам өз еркімен бас тарт­қан, оның ішінде жетеуі тіркеуден кейін өтініш берген. Үшеуі құжаттар топтамасын толық тапсырмағандықтан өткізілмей қалса, біреуінің сайлаушылар қолы жалған болып шыққан. Ал бір үміткер үгіт жүргізу тәртібін бұзғаны үшін тізімнен шығарылды. Нәтижесін­де, сайлауға 128 кандидат қатыс­қан. Бұл – бір орынға орташа 3,05 үміткерден келетін деңгей.

«Бәсекелестігі ең жоғары округ тағы да Ақсу ауданының Ақсу ауылдық округі болды, мұн­да төрт кандидат бақ сынады. Ал ең төмен бәсекелестік Қаратал ауданындағы Бастөбе және Ескелді ауданының Төленгүт ауылдық округтерінде тіркелді, бұл ауылдарда әрқайсысында екі үміткерден ғана ұсынылды», дейді Жетісу облысының аумақ­тық сайлау комиссиясының мүшесі Самат Бейсенов.

Биылғы ауыл әкімдерін сайлау жергілікті басқару жүйесіндегі демократиялық үдерістердің одан әрі дамып келе жатқанын көрсеткен маңызды саяси оқиға болды. Қоғамдық белсенділік те, үміткерлердің саны да жергілікті өзін-өзі басқаруға деген қызығушылықтың күшейгенін байқатады.

Жетісу облысы