Білім бәйгесіндегі бедел

Облыстық білім басқармасының басшысы Нұрбек Оршыбековтің айтуынша, республикалық ғылыми жобалар конкурсында облыс командасы 17 жыл қатарынан «Ең үздік команда» атағын иеленіп келеді. Сонымен қатар қоғамдық-гу­манитарлық бағыттағы пәндер бойынша респуб­ликалық олимпиада қорытындысында оқушылар «Үздік олимпиадалық команда» атанған. 

Биыл облыстағы 5 білім ұясы «Ең үздік олимпиадалық 100 мектеп» республикалық рейтингіне енді. Олардың қатарында дарынды балаларға арналған мамандандырылған «Білім-инновация» лицей-интернаттары, Тараз қаласындағы Ә.Бөкейханов атындағы №1 гимназия, Б.Момышұлы атындағы №45 қазақ классикалық гимназиясы және Т.Рысқұлов ауданындағы №6 мектеп-гимназиясы бар.

Мектеп түлектерінің ҰБТ нәтижесі де көңіл қуантады. Биыл 11-сыныпты тәмамдаған 14 494 түлек­тің 639-ы «Алтын белгі», 1 212-сі үздік аттес­т­­ат иегері атанды. Ұлттық бірыңғай тес­тілеуге 11 911 түлек, яғни мектеп бітірушілердің 82,5 пайызы қатысып, орташа көрсеткіш 79,9 балды құраған. Ал 4 түлек ең жоғары 140 балл жинап, облыстың білім саласының абыройын тағы бір мәрте асқақтатты.

Мектеп оқушыларының білім жетістіктерін мони­торингтеу нәтижелері де облыс оқушы­ларының республикадағы көшбасшы өңірлер қатарында екенін көрсетті. 9-сынып оқушылары математикалық және жаратылыстану-ғылыми сауаттылық бойынша республикада 1-орын, ал оқу сауаттылығы бойынша 3-орын иеленіп отыр.

Жетістіктер тек оқушылармен шектелмейді. Биыл 76 педагог халықаралық және респуб­ли­калық деңгейдегі байқаулар мен олимпиа­далардың жеңімпазы және жүлдегері атанды. Ұстаздар «Педагогикалық идеялар фестивалі», Teachers Hackathon, «Дарынды балаларға – та­лантты ұстаз», «Алтын тұғыр», «Математикалық регата», OI SANDYQ, «Олимп шыңы» сынды беделді білім сайыстарында үздік нәтиже көрсетті.

Атап айтқанда, республикалық «Матема­тикалық регата» олимпиадасында облыс командасы Бас жүлдені жеңіп алса, бастауыш сынып мұғалімдері арасындағы республикалық олимпиадада ІІ орын, ал OI SANDYQ зияткерлік байқауында ІІІ орын иеленді. Мектепке дейінгі білім беру ұйымдарының педагогтары да рес­публикалық байқауларда бірнеше мәрте Бас жүлде мен жүлделі орындарға қол жеткізді.

Иә, бұл  Жамбыл облысының білім саласы­ның жаңа биігін көрсетіп отыр. Мектеп оқу­шы­лары ғана емес, ұстаздар да жүзден жүйрік шығып жатқаны жан қуантады. Бұл ел ертеңі саналған жастарымыз сенімді қолда деген сөз. 

Саятхан САТЫЛҒАН,

Жамбыл облысы