Білім берудегі сабақтастық

Әл-Фараби атындағы Қазақ ұлттық университетінде студенттердің шығармашылық өкілдерімен кездесуі дәстүрге айналған.

Бүгін болашақ журналистер телевизия саласында еңбек етіп, көрерменге ойлы дүниелер ұсынып жүрген тәжірибелі мамандармен кездесіп, сценарий жазу, түсірілім барысы туралы сұрақтарына жауап алды.

Сабақтастық қай салада да маңызды. Алдыңғы буынның тәжірибесі жастарға таптырмас мектеп. Кездесуде студенттер «Хабар» телеарнасында талай жыл еңбек еткен телевизияның майталмандары Арман Сқабылұлы, Қайнар Олжай, Серік Жанболат, Серік Абас-Шахтың шығармашылық жолдарымен танысып, телеөнім жасау бойынша кеңестерін тыңдады. Мысалы, Арман Сқабылұлы телехикаяға сценарий жазып, продюсерлік етудің қыр-сырымен бөлісті.    

Арман Сқабылұлы, ардагер журналист, продюсер:

- Мына жерде телехикаяның шеберлері отыр. Бұл жәй ғана кездесу емес. Журналистика факультетінде телевизиядағы телехиякаялар мәселесі соңғы кезде қолға алына бастапты. Ұстаздар келіп жатыр екен. Өздеріңіз білесіздер, бұрыннан телехикая түсірілгелі қаншама жылдар болды, бірақ маман дайындалмайтын журфакта. Негізінен Жүргенов академиясын бітіргендер, не болмаса басқа жақтан келгендер дайындайтын. 

Журналистика факультетінде кино&медиа мамандығы бойынша қазір 221 студент білім алуда. Олар кино тарихы, кинорецензия, кинодраматургия бағыттарын меңгеруде. Отандық киноиндустрияны да­мытып, кино және медиа сала­сында заманауи креативті өнімді жа­сау үшін академиялық білім беру ма­ңыз­ды. 

Таңшолпан Шәріпбай, студент:

- Осындай ірі тұлғалармен кездесу арқылы, режисерлік жағынан, сценарий жазу жағынан соның барлығына өзімізге шеберлігімізді шыңдауға көп септігін тигізеді деген ойдамын. Және де болашақта біз қазақ журналистикасына, қазақ киносына өз үлесімізді қоса аламыз деген ойдамын.

Кездесу соңында ұтымды сұрақ қойып, ойлы пікір білдірген 5 студентке «Қазақ әдеби романы» қоғамдық бірлестігінің атынан бір реттік стипендия табысталды.  

Гүлжан Көленқызы, Кенже Амраев