Бір күліп, бір жылап... Мақпал Жүнісова марқұм Заманбек Нұрқаділовтің еш жерде жарияланбаған видеосын көрсетті

Қазақ эстрадасының танымал әншісі, халықтың сүйікті жұлдызы Мақпал Жүнісова желідегі парақшасында марқұм жұбайы, қоғам қайраткері Заманбек Нұрқаділовтің бейнежазбасы мен суреттерін жариялап, көпшілікті тебірентті, деп хабарлайды Arasha.kz.

Әнші жазбасында:

“Топырағыңыз торқа болсын... Қайта оралмас күндерді қарап, бір күліп, бір жылап – өтіп жатқан өмір”, — деп жүрекжарды жолдау қалдырған.

Жарияланған видеода Мақпал Жүнісова мен Заманбек Нұрқаділов “Айша” есімді тотықұсына арнап ән айтып отырған сәт көрсетіледі. Бұл кадрлар көпшілікке өткен күннің сағынышын сездірді.

Оқырмандардың бірі әншіден “Айша” есімді тотықұстың қазіргі жайын сұрағанда, Мақпал Жүнісова былай деп жауап берді:

“Зәкеңнің туысы мен жоқта шомылдырып, тордың бір жағын жаппай қойыпты. Мен 10 жыл бойы өзім жуындырып, торын екі сағатқа бүркеп, кейін ашып жүретінмін. Сол күні терезе ашық қалған екен, жел тиіп өліп қалыпты”, — деді әнші.

Желі қолданушылары Мақпал Жүнісоваға жылы лебіздерін білдіріп, Заманбек Нұрқаділовтің рухына дұға арнады:

“Дауысыңыз бұрынғыдай сыңғырлап тұр, Мақпал ханым. Заманбек ағамыздың жаны жәннатта болсын”,
“Қазақтың арысы еді, халық жадында мәңгі сақталады”,
“Сізге амандық пен ұзақ ғұмыр тілейміз, халықтың сүйіспеншілігіне бөленіп жүре беріңіз”, — деп жазды тыңдармандар.

Сондай-ақ әнші тағы бір жазбасында естелік суреттер топтамасын жариялап, оған қысқаша:

“Суреттер сыр шертеді”, — деген жазба қалдырған.