Биыл Өзбекстан су электр станцияларының өндіріс қуатын 15% ға арттырады

— 2017 жылы республикада жалпы қуаты 1 604 МВт болатын 36 гидроэлектростанция болса, қазіргі уақытта 100-ден астам су электр станциясы 2 400 МВт өндіріп жатыр. Қамтылып отырған кезеңде 13 ГЭС жөндеуден өтіп, 64 жаңа нысан пайдалануға берілді. Бұл жобаларды іске асыру үшін 1,3 млрд доллар инвестиция тартылды, — деді Фаррух Нуруллаев.

Ол атап өткендей, былтыр «O’zbekgidroenergo» ұйымына қарасты кәсіпорындар 6,5 млрд кВт/сағат электр энергиясын өндірді.

— 2026 жылы электр энергиясын өндіру көлемін 15%-дан астамға арттыру, 264 млн доллар инвестицияны игеру жоспарланып отыр. Сонымен қатар биыл жалпы қуаты 152 МВт болатын 15 жаңа өндірістік нысан іске қосылады, 276 жұмыс орны құрылады, — деп ұйымның жоспарларын жариялады Фаррух Нуруллаев.

Еске салайық, Өзбекстан «Қамбарата-1» СЭС-ін Қазақстан және Қырғызстанмен бірлесіп қаржыландырмақ.

Бұған дейін хабарлағанымыздай, былтыр Брюссельде «Қамбарата-1» ГЭС жобасын жүзеге асырудың мәселелері талқыланды.

Қоса кетсек, Өзбекстан Тәжікстандағы «Рогун» ГЭС-інен электр энергиясын импорттайды.