Бүгін футболдан 2026 жылғы әлем чемпионаты өтпелі кезең ойындары басталады

Бұл кезеңде Еуропа құрлығы бойынша іріктеу кезеңінде екінші орын алған құрамалар арасында үздік көрсеткішке қол жеткізген Словакия, Косово, Дания, Украина, Түркия, Ирландия, Польша, Босния және Герцоговина, Италия, Уэльс, Албания, Чехия әлем чемпионатына жолдаманы сарапқа салуға мүмкіндік алды.

Сондай-ақ олардың қатарына Ұлттар лигасында жоғары орыннан көрінген Солтүстік Македония, Румыния, Швеция, Солтүстік Ирландия қосылды. 

Барлығы он алты құрама төрт топқа бөлінді. Олар алдымен жартылай финал ойындарын өткізсе, одан кейін жеңімпаздар финалда бақ сынауға мүмкіндік алады. 

А жолы бойынша Уэльс - Босния және Герцоговина, Италия мен Солтүстік Ирландия, В жолымен Украина мен Швеция, Польша мен Албания, С жолымен Словакия мен Косово, Түркия мен Румыния, D жолымен Дания мен Солтүстік Македония, Чехия мен Ирландия кездеседі. 
Аталған ойындардың арасынан бүгін, 26 наурызда Қазақстан уақытымен 21:50-де Түркия-Румыния, 00:35-те Украина - Швеция кездесулері «Qazsport», Италия -Солтүстік Ирландия ойыны «Qazaqstan» телеарнасынан тікелей эфирде көрсетіледі.

Айта кетсек, «Qazsport» телеарнасындағы Украина - Швеция арасындағы матч барысында өзге кездесулерде соғылған барлық гол live-хайлайт форматында жедел көрсетіледі.

Өзге кездесулер:

Уэльс - Босния және Герцеговина 

Польша - Албания 

Словакия - Косово 

Дания - Солтүстік Македония 

Чехия - Ирландия.

Жартылай финал 26 наурызда болса, финал 31 наурызға белгіленген.

Ал құрлықаралық өтпелі ойындарда бірінші топта алдымен 26 наурызда Жаңа Каледония мен Ямайка сынға түсіп, жеңімпазы 31 наурызда финалда Конго Демократиялық Республикасымен жолдамаға таласады.

Тағы бір топта 26 наурызда Боливия мен Суринам ойнап, жеңімпаз құрама 31 наурызда финалда Иракпен кездеседі. 

Алғаш рет дүбірлі додада 48 құрама бақ сынайды. Қазір оған 42 құрама жолдама алып үлгерді. 
Әлем чемпионатының финалдық кезеңі 2026 жылдың 11 маусымы мен 19 шілдесі аралығында АҚШ-тың Атланта, Бостон, Даллас, Хьюстон, Канзас-Сити, Лос-Анджелес, Майами, Нью-Йорк, Филадельфия, Сан-Франциско, Сиэтл, Канаданның Торонто, Ванкувер және Мексиканың Гвадалахара, Мехико, Монтеррей қалаларында өтеді.

Айта кетсек, Қазақстан құрамасы әлем чемпионаты іріктеу кезеңінде. Қазірге дейін отандастарымыз Уэльстен екі мәрте (1:3, 0:1), Солтүстік Македониядан (0:1), Бельгиядан (0:6) есебімен жеңіліп, Солтүстік Македония және Бельгиямен (1:1) тең түссе, Лихтенштейнді (4:0, 2:0) екі мәрте тізе бүктірді.

Бұған дейін футболдан 2026 жылғы әлем чемпионатының жеребесі тартылғанын жазған едік.