Цифрландырудың арқасында банк жүйесі жаңа бағалау жүйесіне дайын

Отбасылардың әлеуметтік әл-ауқатын бағалаудың жаңа жүйесі банктердің несие беру туралы шешіміне әсер ете ме? Бұл сұраққа брифинг барысында Ұлттық банк төрағасы Тимур Сүлейменов жауап берді.

Қаржы реттеушісінің басшысы Қазақстанның қаржы саласы жоғары деңгейде цифрландырылғанын және мемлекеттік органдардың негізгі деректер базаларымен интеграцияланғанын атап өтті. Мемлекеттік кредиттік бюро мен Бірінші кредиттік бюро арқылы банктер әлеуетті қарыз алушылардың табысы, зейнетақы аударымдары және мүлкі туралы толық ақпарат алады.

Осыған байланысты отбасылардың әл-ауқатын жалпыұлттық деңгейде бағалау жүйесін енгізу банктердің клиенттерге деген көзқарасын өзгертпейді.

«Мен бұл жерде қандай да бір қосымша тәуекел көріп тұрған жоқпын. Біздің қаржы жүйеміз онсыз да жеткілікті деңгейде цифрландырылған. Менің ойымша, бұл банктер үшін маңызды емес. Екінші деңгейлі банктердің (ЕДБ) өз скорингтік модельдері бар. Оның үстіне, олар әлдеқайда жетілдірілген және әрбір қаржы институтының саясатына байланысты қолданылады», — деп түсіндірді Тимур Сүлейменов.

Ұлттық банк басшысының айтуынша, банктерде қарыз алушылардың санаттары мен тәуекелдерінің цифрландырылған профильдері бұрыннан бар.

«Сондықтан отбасылардың әл-ауқатын бағалаудың жалпыұлттық жүйесін енгізу несие беруге ешқандай әсер етпейді деп есептеймін», — деп түйіндеді Ұлттық банк төрағасы.

Еске салайық, 2027 жылғы 1 қаңтардан бастап Қазақстанда әлеуметтік жәрдемақылардың кейбір түрлері мұқтаждық қағидаты бойынша, яғни отбасының әл-ауқатын объективті бағалау негізінде беріле бастайды.

Осы жүйе аясында қазақстандық отбасылар мынадай санаттарға бөлінеді:

А санаты — әл-ауқаты жоғары отбасылар (табысы жоғары);

B санаты — ауқатты отбасылар;

C санаты — орташа деңгей (жағдайы қанағаттанарлық);

D санаты — әл-ауқаты төмен отбасылар (кедейлік шегінде);

E санаты — шұғыл көмекке мұқтаж отбасылар (аса осал санат).

Бүгін, 14:37