Тұрғын үй жинақ жүйесіне жаңа банк қосылуы мүмкін

Қазақстанда тұрғын үй-жинақ жүйесіне тағы бір банк қосылуы ықтимал. Нұрбанк тұрғын үй жинақтарына қатысу мүмкіндігін қарастырып жатыр.

Қаржы ұйымы 2026 жылы арнайы жинақ шоттарын ашып, ипотекалық өнім әзірлеуді жоспарлаған. Қазіргі таңда жоба бастапқы пысықтау кезеңінде, оның негізгі талаптары мен тиімділігі талдануда.

Банк жаңа өнімдерді әзірлеуде Отбасы банкі-мен бәсекелестікке ерекше мән беріп отыр. Айта кетейік, қазіргі таңда мемлекеттен 20% сыйақы алатын жалғыз қаржы институты – осы банк.

Сондықтан Нұрбанк клиенттерді тарту үшін өз депозиттері бойынша мөлшерлемені жоғары ету мүмкіндігін қарастыруда.

Сонымен қатар банк зейнетақы жинақтарының артық бөлігін тұрғын үй депозиттерін толықтыруға пайдалану тетігін енгізуді де жоққа шығармайды.

Бұған дейін Freedom Bank серіктестерімен бірге жаңа тұрғын үйлерге 5–10% мөлшерлемемен ипотека ұсынатыны хабарланған.