Цифрлық активтерден табыс тапқандар үш жылға салықтан босатылуы мүмкін

АСТАНА, 14 шілде – Sputnik. Қазақстанда цифрлық активтердің заңды айналымын ынталандыру үшін жаңа салықтық жеңілдік енгізу ұсынылып отыр, деп хабарлайды Sputnik Қазақстан үкіметтің баспасөз қызметіне сілтеме жасап.

Егер бастама қабылданса, 2026 жылғы 1 қаңтардан 2028 жылғы 31 желтоқсанға дейін қазақстандық цифрлық актив провайдерлері арқылы жасалған операциялардан табыс тапқан жеке тұлғаларға жеке табыс салығы салынбайды.

Бұл ұсыныс Жаңа Салық кодексін енгізу жөніндегі жобалық кеңсенің 21-ші отырысында қаралған түзетулер пакетіне енгізілген.

Сонымен қатар түзетулер инвесторларға қолайлы жағдай жасауға бағытталған. Атап айтқанда, инвестициялық басым келісімшарттар жасау тетігін қайта енгізу, сондай-ақ инвесторларға қажетті инфрақұрылымды өз қаражатына жүргізіп, кейін бұл шығынды корпоративтік табыс салығы (КТС) бойынша шегерім арқылы өтеуге мүмкіндік беру ұсынылып отыр.

Жаңа пакетке кәсіпкерлерге қатысты да бірқатар бастама енгізілген. Олардың қатарында тауарларды таңбалауға кеткен шығындарға қосымша салықтық шегерім беру, факторинг пен форфейтинг қызметтерін қосылған құн салығынан (ҚҚС) босату, мүгедектігі бар адамдарға жеке табыс салығы бойынша шегерімдерді кеңейту және жеміс шарабына акциз енгізу мәселелері бар.

Жалпы, жаңа Салық кодексіне ұсынылған түзетулер пакетіне 45 өзгеріс енгізілген. Бірқатар бастама бизнес-қоғамдастықпен қосымша талқыланғаннан кейін ғана заң жобасына енгізіледі.