Дания Украинаға 276 млн доллар көлемінде жаңа көмек пакетін жіберуді жоспарлап отыр

АЛМАТЫ, 19 қыркүйек – Sputnik. Дания Украинаға 276 миллион доллар көлемінде жаңа көмек пакетін жіберуді жоспарлап отыр. Бұл туралы DR телерадиокомпаниясы Данияның сыртқы істер министрі Ларс Лекке Расмуссен мен қорғаныс министрі Йеппе Бруусқа сілтеме жасап хабарлады.

Сейсенбі күні Расмуссен Данияның Сыртқы істер министрлігі Ресей елшісін шақыратынын мәлімдеді. Бұл Балтық теңізіндегі Гедсер жағалауына жақын халықаралық суларда болған даниялық тікұшақ пен ресейлік кемеге қатысты оқиғамен байланысты болуы мүмкін. Алайда Дания СІМ мәлімдемесінде бұл туралы нақты дәлел келтірілмеген.

"Ларс Лекке мен Йеппе Бруус сондай-ақ сыртқы саясат жөніндегі комиссияның Украинаға 1,8 миллиард крон, яғни 276 миллион доллар көлемінде жаңа көмек пакетін мақұлдағанын айтты", -делінген телерадиокомпания хабарламасында.

Министрлердің айтуынша, жаңа көмек пакеті даниялық тікұшақ пен ресейлік кеме арасындағы оқиғаға жауап ретінде қабылданған. Сонымен қатар Расмуссен Мәскеудің Копенгагеннің мұндай әрекеттерін арандатушылық деп санайтынына аса мән бермейтінін айтты.

Бруустың айтуынша, бұған дейін оның жаңа украиналық әріптесі Даниядан Украина аумағында өндірілген қару-жарақты, атап айтқанда баллистикалық зымырандар мен ұшқышсыз ұшу аппараттарын сатып алуға қаражат бөлуді сұраған.