Бельгия Украинаға 1 млрд еуро көлемінде қолдау пакетін дайындап жатыр

АСТАНА, 15 қазан – Sputnik. Бельгия 2026 жылға арналған бюджетінің бөлігі ретінде Украинаға 1 миллиард еуро көлемінде қолдау пакетін дайындап жатыр деп мәлімдеді Бельгияның қорғаныс министрі Тео Франкен. Ол мұны НАТО қорғаныс министрлерінің жиналысы алдында айтты, деп хабарлады РИА Новости.

"Келесі аптада бюджеттік келісімге қол жеткіземіз деп үміттенемін, содан кейін 2026 жылы Украина үшін не істей алатынымызды талқылаймыз. Біз әдеттегідей 1 миллиард еуро көлеміндегі қолдау пакетін дайындап жатырмыз. Менің ойымша, бұл мәселеде ешқандай проблема болмайды", - деді бельгиялық министр.

Бірақ ол бюджет әлі келісілмегенін мойындады.

Ол сондай-ақ бұғатталған ресейлік активтерді талқылаудан бас тартып, барлық сұрақты Бельгияның премьер-министрі Барт де Веверге бағыттау керектігін айтты.

Украинадағы қақтығыс басталғаннан кейін Еуроодақ пен "Үлкен жетілік" елдері Ресейдің шамамен 300 миллиард еуроны құрайтын валюта қорының жартысына жуығын бұғаттаған. 200 миллиардтан астам қаражат Еуроодақта, негізінен (176 миллиард) әлемдегі ең ірі есеп айырысу және клиринг жүйелерінің бірі – бельгиялық Euroclear шоттарында жатыр.

Ресей сыртқы істер министрлігі бұл әрекеттерді бірнеше рет ұрлық деп атап, ЕО жеке тұлғалардың қаражатын ғана емес, сонымен бірге мемлекет активтерін де бұғаттағанын мәлімдеді.