Дәурен Абаев: Ұлы Жеңіс өскелең ұрпаққа берілуге тиіс сабақ

АЛМАТЫ, 31 қазан — Sputnik. Ұлы Жеңіс – жай ғана тарих беті емес, біз өскелең ұрпаққа беруге тиіс сабақ, деп мәлімдеді Қазақстанның Ресейдегі елшісі Дәурен Абаев.

Дәурен Абаев "Ресей халықтары" бүкілресейлік форумында сөз сөйлеп, Ресей мен ТМД халықтарының тарихи зердесін қорғау мәселесін көтерді.

"Біз үшін бұл тарихи зерде қастерлі", - деп атап өтті ол.

Абаев соғыс жылдарында Қазақстаннан 1,2 миллион сарбаз әскерге шақырылғанын және олардың жартысы майданнан оралмағанын еске алды.

Дәурен Абаев 1941-1945 жылдардағы оқиғаларды есте сақтап, өскелең ұрпаққа жеткізуіміз керек сабақ деп атады.

"Ол үшін қолдан келгеннің бәрін жасадық және жалғастыра береміз", - деді ол.

Қазақстан Жеңістің 80 жылдығын атап өтуге арналған арнайы жоспарды бекітті, оған көптеген іс-шара кірді. Мысалы, 500-ден астам көшеге соғыс батырларының есімін беру туралы шешім қабылданды. 7 мамырда Астанада ауқымды парад өтті.