Денсаулық сақтау министрлігі антибиотиктер мәселесін қолға алды дәріханаларға ірі мөлшерде айыппұл салынды

Қазақстанда антибиотиктерді бақылаусыз қолдану және оларды рецептсіз сату мәселесі әлі де талқыланып жатыр. TengriHealth тілшісі қанша заңбұзушылық анықталғанын білген еді.

Қазақстанда антибиотиктерді бақылаусыз қолдану және оларды рецептсіз сату мәселесі әлі де талқыланып жатыр. TengriHealth тілшісі қанша заңбұзушылық анықталғанын білген еді.

Бір жарым жылда 100-ге жуық заңбұзушылық

Денсаулық сақтау министрлігінің Медициналық және фармацевтикалық бақылау комитеті біздің сауалымызға берген жауабында Қазақстанның дәрілік заттардың мемлекеттік тізілімінде қазіргі уақытта 420 антибактериалды препарат тіркелгенін хабарлады.

"ҚР "Халық денсаулығы және денсаулық сақтау жүйесі туралы" кодексінің 233-бабы 5-тармағына сәйкес, рецептімен берілетін дәрілерді дәрігердің нұсқауынсыз сатуға тыйым салынады. Олар қағаз және (немесе) электронды түрде жазылады", - деп еске салды ведомство өкілдері.

Дегенмен, Медициналық және фармацевтикалық бақылау комитеті мәліметінше, дәріханалар антибиотиктерді сату ережелерін әлі де бұзып келеді.

Микробқа қарсы препараттарды рецептсіз сатқаны үшін ҚР ӘҚБтК-нің 426-бабы 1-бөлігі ("Фармацевтикалық қызметтің және дәрілік заттар мен медициналық бұйымдардың айналысы саласының қағидаларын бұзу") бойынша төмендегідей хаттамалар толтырылған:

2025 жылы - 9,5 миллион теңгеден аса сомаға 59 әкімшілік хаттама; 2026 жылдың бірінші жартыжылдығында - 8 миллион теңгеден аса сомаға 38 хаттама. Бақылау қалай күшейтілмек?

Денсаулық сақтау министрлігі дәріхана желілерінде микробқа қарсы препараттардың сатылуын бақылау Медициналық және фармацевтикалық бақылау комитетінің департаменттері және жұртшылықпен бірлесіп күшейтіліп жатқанын мәлімдеді.

Сондай-ақ фармацевтер үшін тұрақты тренингтер өткізіліп, халыққа антибиотиктерді дұрыс қолданбаудың қауіптері туралы ақпарат беріліп жатыр.

"Сонымен қатар, Денсаулық сақтау министрлігі денсаулық сақтау саласындағы заңнамаға дәрі-дәрмектер мен медициналық бұйымдарды интернет-ресурстар арқылы сату талаптары бойынша өзгерістер мен толықтырулар енгізуді жоспарлап отыр", - делінген хабарламада.

Бұған дейін Денсаулық сақтау министрлігі маркетплейстерде рецептімен берілетін препараттарды, соның ішінде танымал антибиотиктерді сатуға толық тыйым салуды ұсынған болатын. Бұл "сүйікті" антибиотикті немесе кез келген басқа рецептілік дәріні үйге немесе тапсырыс беру пунктіне жеткізу арқылы еркін сатып алу мүмкін болмайтынын білдіреді.

Денсаулық сақтау министрлігі нормативтік құқықтық нормалар жобасын күзге қарай дайындайды деп күтіледі.

Еске салайық, Ұлттық қоғамдық денсаулық сақтау орталығы мәліметінше, еліміздегі антибиотиктерді тұтыну құрылымы әзірге ДДСҰ ұсынымдарына сәйкес келмейді.

Денсаулық сақтау министрлігі ДДСҰ ең көп таралған инфекцияларды емдеуге кеңес беретін Access тобындағы базалық антибиотиктердің үлесі, ұсынылған 70 пайыздан кем емес деңгейдің орнына, жалпы тұтынудың небәрі 38,3 пайызын ғана құрайтынын атап өтті.

Бұл ретте, елімізде анағұрлым қуатты Watch тобындағы антибиотиктер әлі де кеңінен қолданылып, ал оларды шектен тыс пайдалану бактериялардың емге төзімділігінің дамуына ықпал етуі мүмкін.

Google News арқылы жаңалықтарымызды қадағалаңыз

Жазылу

Денсаулық сақтау министрлігі

Қазақстан

дәріхана