Депутат: Жаңа Конституция ел дамуының жаңа кезеңін бастайды

— Жаңа Конституциядағы маңызды жаңалықтардың бірі — вице-президент лауазымының енгізілуі. Мұндай институт бірқатар шет мемлекетте бар. Вице-президент саяси сабақтастықты сақтап, мемлекеттік басқаруда тұрақтылық пен теңгерімді қамтамасыз етуге көмектеседі. Жалпы, жаңа Конституцияның басты қағидаты — адам құқықтарын қорғау. Соның айқын мысалдарының бірі — Миранда қағидасының енгізілуі, — деді Наталья Дементьева.

Сонымен қатар, депутат отбасы институтына арналған жеке баптың енгізілуін маңызды шешім деп бағалады. Оның пікірінше, бұл норма қоғамдағы жауапкершілік пен дәстүрлі құндылықтарды нығайтуға ықпал етеді.

— Жаңартылған Конституцияда отбасы институтын қолдауға ерекше мән берілген. Негізгі заңда отбасы қоғамның маңызды тірегі ретінде қарастырылып, оны қорғау мен нығайтуға бағытталған қағидаттар бекітілген. Бұл дәстүрлі отбасылық құндылықтарды ілгерілетуге, өскелең ұрпақты сол құндылықтарды құрметтеу рухында тәрбиелеуге мүмкіндік береді. Бұған дейін Мәжілісте ЛГБТ пропагандасына қатысты мәселе қаралып, оған тыйым салу туралы шешім қабылданған болатын. Бұл бастаманы Президент Қасым-Жомарт Тоқаев та қолдады, — деді Наталья Дементьева.

Депутаттың айтуынша, жаңа Конституция саяси немесе әлеуметтік мәселелермен ғана шектелмей, елдің болашақ дамуына әсер ететін білім, ғылым және инновация салаларына да ерекше назар аударады.

— Бүгінде жастардың өмірін жасанды интеллектсіз елестету қиын. Дегенмен оның кері әсері де болуы мүмкін екенін ұмытпау керек. Мұны ата-аналар да түсіндіруі қажет. Жасанды интеллект білімнің орнын басатын құрал емес, тек көмекші тетік ретінде пайдаланылуы тиіс. Білім әрдайым бірінші орында тұруы керек. Бұл қағида жаңа Конституциямызда айқын көрініс тапқан, — деді спикер.

Айта кетейік, бүгін Президент Қасым-Жомарт Тоқаев республикалық референдум барысында жүргізілген экзит-полл қорытындысымен танысты.