Дертке дауа орталық

Ақтау қаласында позитрон-эмиссиялық томография (ПЭТ/КТ) орталығы ашылды. Батыс өңірлері арасында тұңғыш рет Маңғыстау облысында ашылған орталықтың мақсаты – қатерлі ісік сияқты күрделі аурулардың рецидивін ерте кезеңде анықтау, жоғары технологиялы медициналық қызметті тұрғындарға қолжетімді ету.

Сурет: gov.kz

Орталық ПЭТ/КТ зерттеуінен өтуге Ас­тана, Алматы қалала­рына баруға мәжбүр болатын Маңғыстау облысы мен көрші өңірлердің тұрғындарына уақыт пен шығынды үнемдеуге әрі жасанды интеллектінің көмегімен заманауи диагностика жасауға мүмкіндік береді.

Маңғыстау облысы әкімі баспасөз қызметінің мәлім­деуінше, орталық жылына 2000-нан астам зерттеу жүргізіп, 25 жаңа жұмыс орнын құрады. Алғашқы күннің өзінде бірнеше пациент ПЭТ/КТ зерттеуінен өтті. Медициналық жабдықтар Германия, АҚШ, Оңтүстік Корея­дан жеткізілген.

Жоба «Orhun Medical» компаниясы мен Маңғыстау облысы әкімдігінің қолдауымен жүзеге асты. 2024 жылғы
4 жел­тоқсанда облыс әкімі Нұр­дәулет Қилыбай Мемлекет басшысының тапсырмасына сәйкес «Orhun Medical» ЖШС-нің бас директоры Дирик Гёненчпен арнайы кездесіп, Маңғыстау тұрғындарының шетелде емделуге жұмсайтын шығындарын азайту, ел ішінде медициналық қызметтердің қолжетімділігін арттыру мақсатында заманауи онкологиялық орталық ашу, қызметкерлерді оқыту жөнінде уағдаласқан болатын.

Өңір басшысы Нұрдәулет Қилыбай ПЭТ/КТ орталығының ашылуын аймақтарда жоғары технологиялы медициналық көмекті дамытудың маңызды қадамы деп атап өтті.

– Мемлекет басшысы ден­саулық сақтау саласын дамытуға баса мән беріп келеді. Еліміздің батыс өңірінде тұңғыш рет қатерлі ісік секілді ауруларды ерте анықтайтын орталық біздің облыста ашылып отыр. Енді жергілікті тұрғындар алысқа бармай, осында толыққанды тек­серуден өте алады. Ерте диаг­ностика қолжетімді болған сайын, дерттің асқынған түр­лерін анықтау көрсеткіші де төмен­дейді. Осы орайда, жобаға қолдау көрсеткен Үкімет­ке, Денсаулық сақтау министр­лігіне алғыс білдіреміз, – деді Нұрдәулет Қилыбай.

Қатерлі ісік ауруы көбейіп тұрған кезеңде мұндай орта­лықтың болуы өте маңызды. Деректерге сүйенсек, 2025 жыл­дың 7 айында Маңғыстау облысында қатерлі ісіктің түрлі сатысында 562 жағдай тіркелген. Атап айтқанда, 312 науқас 1-2 сатысында, 36 науқас 3-4 сатысында, 157 науқас 0-1 сатысында анықталған. Алғаш рет 4-сатысында анықталғандар саны 57 жағдайды құрады.

Ауыр дертке шалдық­қан­дарды ерте анықтау арқылы тұрғындарға өмір сыйлауға сеп болатын орталықтың ашылуы –  өңір медицинасына қосылған тың мүмкіндік.

Маңғыстау облысы