Димаш Лондон жұртын тәнті етті

Лондон жеті жыл күткен ұмытылмас күн. Ұлыбритания астанасында Қазақстанның Халық әртісі Димаш Құдайбергеннің жеке концерті өтті.  Stranger, яғни «Бейтаныс жан» атты ән кеші мыңдаған көрермен жинап, тағы бір рекорд орнатты.

Ғалымжан Қараманұлы, тілші:

Концерттік залдың алдында көрермен көп. Көңіл-күйлері көтеріңкі. Лондон Димашты қарсы алуға дайын. Ән кеші өтетін алаң шамамен он екі жарым мың адамды сыйдыра алады.

Соңғы рет Димаш Лондонда 2018 жылы өнер көрсеткен. Оны асыға күткен Британ халқы өнер мерекесі басталмай жатып, ғимарат сыртында қазақша ән шырқады. Жан тебірентер көрініс. Қазақ баласының өнер арқылы елімізді танытып, әлемді аузына қаратқаны көзіңе еріксіз жас ұялатады. Шынымен де ұмытылмас күн! 

Кристина Брейн, жанкүйер:

- Димаш, Лондонға қош келдіңіз. Бізге сыйлайтын қуаныш үшін рақмет айтамыз. Біз сізді жақсы көреміз. 

Концерт Қазақстан мен Ұлыбританияның әнұранымен басталып, патриоттық рухты тағы оятты. Отандастарымыз ғана емес, шетелдіктер де Шәмшінің әнін шырқады. 

Димаш сахнаға шыққанда барлығы тұрып қарсы алды. 50-ден астам елден келген диарстар әншімен бірге қуанды, күрсінді, жылады. Әр ән аяқталған сайын орындарынан тұрып, қошемет көрсетті. Дауыс ауқымы алты октаваны құрайтын, 16 тілде ән шырқайтын қазақ баласына қосылып ән айтты. Тыңдармандар дарын иесімен бірге «тағдырдан махаббат» сұрады, «ақ боз ат»-қа мініп, шапты. 

Димаш Құдайберген, Қазақстанның Халық әртісі:

- Сіздердің алдарыңызға шығып, осы концертті беру - мен үшін үлкен мәртебе. 2017 жылы мен арман қуған 22 жастағы жігіт едім. Қазақстанды әлемге таныта бастаған сәтім еді. Сол кездегі әнді бірге орындасақ.

Шығармашылық және техникалық топ кештің әсерлі өтуі үшін бар жандарын салды. Сахна жарығы, техникалық жабдықтар, бәрі-бәрі жоғары деңгейде болды.

Қанат Айтбаев, продюсер:

- Гастрольдік сапармен 44 адам жүрміз. Қазақстаннан, Қытайдан, Германиядан, Испаниядан, Кубадан және Ресей мен Украинадан келген командамыздың мүшелері бар. Оның ішінде техникалық құрам, артистік құрам, әкімшілік құрам бар. 

Концерт басы мен аяғы, шарықтау шегі бар тұтас бір қойылым іспетті болды. Әрбір ән сол тұжырымдамаға лайықталып таңдалған. Әлемді бейбітшілікке, мейірім мен махаббатқа шақырған бейне үндеулердің өзі бір төбе. Кейбір сахналық нөмірлер шағын бейнебаян көріп отырғандай әсер қалдырды. Бағдарламада би де, қазақтың тарихын айқындайтын күй өнері де болды. 

Биатрис Родригес, жанкүйер:

- Димаш, мен сенің еліңді, халқыңды, отбасыңды және өзіңді жақсы көремін. Жылы жүрегіңді, қайрат-жігеріңді қадірлеймін. Өміріме бақ болып кіріп, өзгерткенің үшін алғысым шексіз.

Үш сағат бойы табиғи дауыста ән айту — бәрінің бірдей қолынан келе бермейтін іс. Тәжірибелі әншілердің өздері шығарманы жанды дауыспен орындаған соң шаршап қалып жатады. Алайда Димаш сахнада бірнеше сағат бойы ән шырқаса да үйлеріне қайтпай, қонақ үйі жанында күтіп тұрған жанкүйерлерімен тілдесіп, фотоға түсіп, қолтаңба беріп, жұртты тәнті етті.

Авторы: Ғалымжан Қараманұлы