ЕАЭО ақылды көлік жүйесінің өзара іс қимылын жетілдіруді жалғастырып жатыр

АСТАНА, 25 ақпан – Sputnik. Еуразиялық экономикалық комиссия кеңесі ЕАЭО елдерінің ақылды көлік жүйесінің өзара іс-қимылын жетілдіру тұжырымдамасын іске асыруға арналған жол картасын бекітті.

"Құжатта ЕАЭО елдерінің ақылды көлік жүйесінің (АКЖ) өзара іс-қимылын ұйымдастыру, сондай-ақ оларды құрудың озық тәжірибесін енгізу бойынша нақты іс-шаралар қарастырылған. АКЖ ЕАЭО-ның Интеграцияланған ақпараттық жүйесі аясында өзара әрекет етеді", – делінген хабарламада.

"Жоспарда базалық сервистер тізбесін айқындау, деректер алмасу форматтарын әзірлеу, нормативтік-құқықтық базаны қалыптастыру және өзара іс-қимылды іс жүзінде ұйымдастыру көзделген", – деп атап өтті Еуразиялық экономикалық комиссияның энергетика және инфрақұрылым министрі Арзыбек Қожошев.

ЕАЭО елдерінің ақылды көлік жүйесінің өзара іс-қимылы тасымалдаушыларға ауа райы жағдайлары, ықтимал кептелістер мен жол апаттары туралы стандартталған ақпарат алуға мүмкіндік беретін бірыңғай ақпараттық кеңістік құруға жол ашады.