ЕАЭО дан тыс елдерден қызанақ әкелуге уақытша тыйым енгізілді

Қазақстанда үшінші елдерден жаңа піскен және салқындатылған қызанақ импорттауға уақытша тыйым салынды.
Тиісті шешімді Ауыл шаруашылығы министрлігі қабылдады. Ведомствоның мәліметінше, шектеу сыртқы экономикалық қызметтің тауар номенклатурасы бойынша 0702 коды арқылы жіктелетін қызанақтарға қатысты қолданылады. Тыйым Еуразиялық экономикалық одаққа (ЕАЭО) мүше емес мемлекеттерден әкелінетін өнімдерге ғана енгізілген.

Сондай-ақ бұл талап автомобиль, теміржол, әуе және теңіз көлігі арқылы жеткізілетін өнімдердің барлығына бірдей қолданылады.

Алайда шектеу Еуразиялық экономикалық одаққа мүше елдерден жеткізілетін қызанақтарға әсер етпейді. Сонымен қатар Қазақстан аумағы арқылы өтетін транзиттік жүк тасымалына және ЕАЭО елдері арасындағы тауар қозғалысына қатысты бұл талап қолданылмайды.

Ауыл шаруашылығы министрлігінің бұйрығына сәйкес, уақытша шектеу 2026 жылғы 30 маусымға дейін күшінде болады.

Тиісті №250 бұйрыққа Ауыл шаруашылығы министрі 2026 жылғы 22 маусымда қол қойған. Құжат сол күні заңды күшіне енді.

Мамандардың пікірінше, мұндай шара ішкі нарықты қорғауға, отандық өндірушілерді қолдауға және маусымдық кезеңде жергілікті өнімдердің өткізілуіне жағдай жасауға бағытталған. Сонымен қатар бұл шешім нарықтағы баға тұрақтылығын қамтамасыз етуге де ықпал етуі мүмкін.