Ecosummer 2025 экологиялық байқауы аяқталды

«Таза Қазақстан» акциясы аясында республикалық деңгейде өткен «EcoSummer 2025» экологиялық байқауы өз мәресіне жетті.

Жарты жылға созылған жарыстың мақсаты халықтың экологиялық мәдениетін арттырып, қалдықтарды жинау және сұраптау бастамаларын қолдау. 

Нәбиев Думан елордада өткен жарысқа арнайы Алматы қаласынан келген. «Таза Қазақстан» акциясы арқылы қоғамды экомәдениет қалыптастыруға шақырып жүрген жас жігіт жарыстың жеңімпазы атанды. Игі бастаманы тек байқау кезінде ғана емес, оған дейін де елдің 8 қаласында мыңнан астам волонтермен бірге насихаттап келеді.

Думан Нәбиев, байқау жеңімпазы:                           

- Бұл жобаға қатысарда волонтерлар болып жиналып, өзіміз видео түсірдік. Қаламызды қоқыстан тазартып, еріктілер шықты. Әр қалада қатысқысы келетін, біздің жобамызда өзін көргісі келетін жастармен, еріктілермен елімізді қоқыстан тазартып, жалпы қоқыс жинау емес, қоқыс тастамау мәдениетін қалыптастырып, эко мәдениетімізді дамытып республикалық деңгейде көтеретін боламыз.

Сәкен Сейфуллин атындағы Қазақ агротехникалық университетінде жүзден жүйрік болғандарды марапаттау рәсіміне Экология вице-министрі де қатысты. Байқауды «Қазақстанның қайталама шикізатты қайта өңдеушілер қауымдастығы» ұйымдастырған. Бас демеушілер жасыл экономика жобасын қолдап жүрген Центр Кредит банк пен «Жасыл Даму» акционерлік қоғамы. Жарысқа қатысушылар саны көп болғандықтан, жеңімпаздар 4 номинация бойынша таңдалды.

Нұржан Дүйсебай, «Жасыл Даму» АҚ баспасөз хатшысы:

- Бірінші номинация «Жас Эко-Амбассадор» деп аталады. 18 жасқа толмағандар. Екіншісі - «Қазақстанның Эко-Азаматы». Ол 18-ден асқандар. Үшіншісі - «Эко-Бизнес деп аталады. Төртіншісі - «Цифрлық Эко-Дауыс» деп аталады. Қаражаттар Центр кредит банк арқылы берілген болатын.

«EcoSummer 2025» экологиялық байқауының жалпы жүлде қоры 15 млн теңге. Биыл бірінші рет өтіп отырған жарыс келер жылы да жалғасын таппақ.

Авторлары: Шерхан Абзалұлы, Мерей Талап