Ел экономикасы: салалар бөлінісіндегі көрсеткіштер қандай?

Биылғы тоғыз айда ел экономикасы 6,3 пайызға артты. Нақты секторда 8,1 , ал қызмет көрсету саласында 5,3 пайыздық өсім бар. Бүгін Үкімет отырысында қаңтар-қыркүйек аралығындағы еліміздің әлеуметтік-экономикалық даму қорытындылары мен республикалық бюджеттің атқарылу барысы талқыланды. Салалар бөлінісіндегі көрсеткіштер қандай? 

Ел экономикасының даму көрсеткіштері көңіл көншітерлік. Сандарды сөйлетсек, жыл басынан бері өсім 6,3 пайызға жетті. Әсіресе көлік қызметі, құрылыс және тау кен өнеркәсібінің дамуы айтарлықтай жақсы. Бұл үздік үштікті сауда, өңдеу өнеркәсібі және ауыл шаруашылығы сынды тағы үш сала жалғайды. Үкімет отырысында сөз алған Ұлттық экономика бірінші вице-министрі Азамат Әмрин, мұндай өсімге инвестициялардың әсері жоғары екенін айтты. Негізгі капиталға салынған инвестиция көлемі біршама артып, небәрі тоғыз айда 13,8 триллион теңгеге жетті. 

Азамат Әмрин, ҚР Ұлттық экономика бірінші вице-министрі:

- Қаржы қызметіне жалпы инвестициялар 2 есеге, білім беруге – 1,8 есеге, өңдеу өнеркәсібіне – 30,7%-ға, ауыл шаруашылығына – 21,1%-ға, көлік қызметтеріне – 14,8%-ға ұлғайған.

Инвестициялардың ең жоғары өсуі Ақмола, Жамбыл (, Ақтөбе  және Павлодар облыстарында, сондай-ақ Астана қаласында байқалды. Инвестициялардың төмендеуі Атырау облысында тіркелді.

Үкімет отырысында республикалық бюджеттің атқарылу барысы да сөз болды. Оған түсім көлемі биыл 10,5 триллион теңге болып, жоспар 97 пайызға орындалған.

Мәди Такиев, ҚР Қаржы министрі:

- Республикалық бюджеттің негізгі шығыстары:

әлеуметтік салаға – 6,5 трлн теңге; өңірлерді қолдауға – 5,6 трлн теңге; нақты секторға – 1,2 трлн теңге бағытталды. Айта кету керек, бүгінгі күні өңірлерді қолдауға бағытталған қаржат көлемі – 74% құрады. Бұл еліміздің теңгерімді әлеуметтік-экономикалық дамуына ықпал етеді. Жергілікті бюджеттер жалпы 9 трлн теңгеге әлеуметтік сала мен негізгі қызметтерге басымдық бере отырып қаржыландырылды.

Енді экономикалық өсімнің тұрақтылығын ұстап тұру үшін орталық және жергілікті атқарушы органдар еңбек етуі керек. Әсіресе инфрақұрылымды салу мен машина жасауды қолдауға бөлінген бюджет қаражаты қатаң бақылануы тиіс. Инвестициялық жобаларды қаржыландыру үшін бюджетті тиісті холдингке бағыттап отыруы керек.  Сондай-ақ биылғы егінді төкпей-шашпай, толық көлемде жинауға жағдай жасаулы керек.

Авторлары: Альмира Оразбай Ақылбек Есімсеитов