Елде оқу бағдарламасына ЖИ негіздері енгізілді

Елде 1-11-сыныпқа дейін барлық оқушылар үшін оқу процесіне жасанды интеллект негіздері енгізіліп жатыр.

Яғни ЖИ «Цифрлық сауаттылық» және «Информатика» пәндеріне интеграцияланды. Пилоттық жоба аясында жасанды интеллектіні оқытуға кемінде 12 сағат бөлінеді. Ал дәріс тақырыптары оқушыладың жас ерекшелігіне сай таңдалады. Бұндағы мақсат - балаларды  жасанды интеллект құралдарын сауатты басқару мен қолдануға үйрету, - дейді мамандар. Медиасауаттылықты арттыру барысында жеке деректерді қорғаудың маңыздылығы да түсіндіріледі.

Динара Сағадатова, Жасанды интеллект құралдарын енгізу бойынша тренер:  

- Интернетте балалар көп ақпаратты қалдыруы кетуі мүмкін. Енді ЖИ құралдарымен жұмыс істеген кезде чат-боттарға да көп документтер кіріп кетуі мүмкін. Мәселен, мекенжайларын, телефондарын. Пайдаланған әрбір ақпаратты чат-ботқа салған кезде кім көреді, не үшін пайдаланады, біз оны білмейміз. Сол үшін балаларды оған үйрету керек. Мұғалімдерді дұрыстап үйретсек біздің басқа да ұрпақтарымыз тез-тез цифрлық сауаттылықты, ЖИ сауаттылығына тез жете алады.

Цифрлық алаңда жасанды интеллект пайда болысымен, балаларға берілетін тапсырма да соған сай өзгеріп жатыр, - дейді сарапшылар. Сондай-ақ, академиялық адалдық мәселесі де күн тәртібінде тұр. Антиплагиат құралдарын заманға сай жетілдіру қажеттілігі туындап отыр.

Динара Сағадатова, Жасанды интеллект құралдарын енгізу бойынша тренер:

- Мәселен, тек мектеп саласында емес, колледждерде де, университеттерде де сондай мәселе шығып жатыр. Академиялық мақалалар қазір көбіне чат-боттар бойынша жазылады. Бір мәселе, егер ол тек аударылса мысалы қазақ, орыс, алғылшын тілдерінен. Екінші мәселе, барлық жұмысты тек сол чат-ботпен жазып тастайды. Сондықтан біз этикалық дилеммаларды көтеру керекпіз.

330 мың мұғалім ЖИ курсын оқыды

Ал жаңа оқу жылында 330 мыңнан астам мұғалім жасанды интеллектіні білім беруге тиімді пайдалану бойынша курстан өтіп, оның 260 мыңға жуығы куәлік алды. Педагогтердің цифрлық сауаттылығын арттыруға бағытталған оқыту бағдарламасы жалғасып жатыр.  Курс барысында мұғалімдер ЖИ құралдарын тиімді әрі этикалық тұрғыда дұрыс қолдануды, промпт жазу, сабақ жоспарлауды, тестілеу мен оқу материалдарын әзірлеуді меңгереді.