Елде теледидар көру көрсеткіші артты

Қазақстанда теледидар көру көрсеткіші артты. Теле өлшем қорытындысы бойынша елдегі телевизия аудиториясы 21 пайызға өскен. 

Бұл өсімнің негізгі үлесі шағын қалалар мен ауылдық елді мекендерге тиесілі. Зерттеу нәтижелері Алматыда өткен Ұлттық медиа қауымдастық құрылтайшыларының қорытынды жиынында айтылды.

Зерттеу нәтижелері теледидардың елдегі ең ықпалды ақпарат көздерінің бірі екенін көрсетті. Әсіресе өңірлерде көк жәшіктің орны бөлек. Шағын қалалар мен ауыл тұрғындары теледидарды күніне орта есеппен үш сағаттан аса тамашалайды. Бұл ірі қалалардағы көрсеткіштен едәуір көп.

Кемелбек Ойшыбаев, «Хабар» агенттігі» АҚ Басқарма төрағасы, Ұлттық медиа қауымдастығының байқау кеңесінің төрағасы:

- Мысалға, жылдың қорытындысы бойынша «Хабар» агенттігінің жалпы қаралымдары 600 млн-нан асып кетті. Әр жобаның, арналардың атын айтып бөлмей-ақ қояйын. Дегенмен қазақстандық арналардың өндірген контенті интернет желісінде, түрлі желілерде, әсіресе ютубта миллионнан астам қаралым жинайды. Сонымен қатар Google-дың Орталық Азиядағы ресми өкілі Genesis мәліметі бойынша, Google-да ең көп қаралатын контенттің 70 пайызы телеарналардың контенті болып саналады.

Бұрын телеөлшемге еліміздің 21 қаласы қатысса, биыл ауылдар да қамтылды. Теле өлшемнің ауқымы кеңейгендіктен көрсеткіштер де өзгерді. Әсіресе шағын қалалар мен ауылдарда теледидар жастар арасында ерекше сұранысқа ие болып шықты. Егер аймақтарда теледидарды көбінесе 18-24 жас аралығындағы көрермендер көрсе, мегаполистерде негізгі аудитория - 45 жастан асқан адамдар.

Татьяна Старцева, K Research Central Asia Бас директоры:

- Біз үшін маңыздысы – көрермен аудиториясының демографиялық айырмашылығын бағалай алғанымыз. Зерттеу көрермендер әлдеқайда жас екенін көрсетті. 18-35 жас аралығындағы адамдар теледидарға әлдеқайда көп уақыт бөледі және ол аймақтарда жиі байқалды.  Олар қазақ тіліндегі контентті белсендірек көреді, бұл отандық телеарналар үшін өте маңызды.

Расында өңірлерде теледидарды қазақ тілінде көретіндердің үлесі басым. Ауылдар мен шағын қалаларда көрерменнің 82 пайызы қазақ тіліндегі контентті таңдайды. Ал үлкен қалаларда бұл көрсеткіш 59 пайызға жетті.

Валерий Маштаков, Media Nova Бас директоры: 

- Қазір телеарналар контентті қалай әрі қарай трансформациялау керегін ойлап жатыр, сонда ғана телевизия өзінің танымалдығын сақтай алады. Сондай-ақ біз қазір көрерменіміз кім, олар не көргісі келеді деген сұрақ төңірегінде ойлануымыз керек. Телевизияның болашағы бар – бұл анық. Сондықтан біз оны дамытуға және теледидарды барынша қолжетімді жолдармен, соның ішінде сандық (digital) ортада да танымал етуге бар күшімізді саламыз.

Қазір телевизия жаңа технологиялар мен аудитория талаптарына барынша бейімделіп келеді. Көрермен телеарналарға сенімді дереккөз ретінде қарайды. Телеөлшем мәліметтері медианарық үшін де маңызды. Өтімді телеөнім жасау – саланың болашағын айқындайды.

Авторлары: Гүлжан Көленқызы, Радик Жакупов