Екібастұзда отандық өніммен қамту көрсеткіші артты

Екібастұзда ішкі сұранысты қамтамасыз ету үшін көкөністі жабық алаңдарда өсіріп жатыр. Қалада 10 жыл бұрын іске қосылған ірі жылыжайдың елімізде баламасы жоқ. Кешеннің аумағы тағы 10 гектарға ұлғайтылады. Нәтижесінде отандық өніммен қамту көрсеткіші артады. Жылыжайда өсетін қияр мен қызанақ елдің өзге де өңірлеріне жөнелтіледі. 

Кешенде қияр мен қызанақ өсіріледі. Жыл сайын шамамен 15 мың тонна өнім  алынады. Ал жаңа жылыжайда тек қызанақ өсіру жоспарланған. Жоба құны 8 миллиард теңге. 

Аңсат Жаңатаев, жылыжай кешені серіктестігінің директоры:

- Жаңа жылыжайда арнайы жарық жүйесі орнатылады. Ол қызанақ өсіруге арналған LED шамдар. Жаңа өндіріс энергия үнемдеу технологиясымен ерекшеленеді.

Кәсіпорын қылмыстық атқару жүйесімен әріптестік орнатып, жеңіл жазаға тартылған 140 адамды тұрақты жұмыспен қамтып отыр. Бұл — жазасын өтеушілерді еңбек арқылы қоғамға бейімдеуге бағытталған әлеуметтік бастама.

Расул Фазылгаянов, жазасын өтеуші:

- Мұнда жұмыс істеп, шығындарымды өтей аламын. Еңбекақы аламыз, бұл – үлкен мүмкіндік. Өте  ұнайды, тіпті жазамды өтеп болған соң, осында тұрақты жұмысқа  қалғым келеді.

Жаңа жоба іске қосылған соң қосымша 120 жұмыс орны ашылады. Анар Сейтенова жылыжайда 5 жылдан бері жұмыс істейді. «Технология алға озса да, адам қолымен атқарылатын жұмыс көп», - дейді ол.

Анар Сейтенова, бағбан:

- Күніне бес қатар өсімдікті байлап, өңдеп, артық өскіндерін алып тастаймыз. Әр түпке  жеке нөмір қойылады. Жұмыс көп, бірақ нәтижесін көргенде шаршағаның ұмытылады.

Павлодар облысында көкөністі жабық алаңда өсіру ісі дамып жатыр. Аумағы 30,8 гектар болатын үш ірі өндірістік жылыжай кешені жұмыс істеп тұр. Былтыр он мың тоннадан астам өнім нарыққа шығарылды. Бұл кәсіпорындарға мемлекеттен тұрақты қолдау бар.

Лаура Құсайынова, Облыстық ауылшаруашылығы басқармасының бас маманы:

- Агроөнеркәсіптік секторды мемлекеттік қолдау аясында басымдыққа ие дақылдарды субсидиялау бойынша өтінімдер қабылданып жатыр. Бұл тізімге өнеркәсіптік жылыжайларды субсидиялау да енгізілген. Атап айтқанда, бір вегетациялық кезеңге жұмсалған электр энергиясы мен жылу шығындарының бір бөлігін өтеу қарастырылған.

Екібастұзда салынып жатқан жаңа жылыжай келесі жылдың қазан айында іске қосылып, желтоқсанда толық өндірістік қуатқа шығады. Жалпы өнім көлемі жылына 20 мың тоннаға жетеді. Кәсіпорын басшылығы: «Инвестициялық жоба мұнымен шектелмейді», - дейді. Алдағы екі жылда аумағы 10–15 гектар болатын қосымша екі жылыжайдың құрылысы басталады.